Koronavirusa yoluxmaqdan qoruyan ƏSAS VASİTƏ... - İnfeksionist açıqladı

19 Noyabr 2020 13:14

"Yoluxma sayı hazırda Azərbaycan üçün pik səviyyədədir".

Bunu Milli.Az-a açıqlamasında infeksionist İlahə Vəliyeva deyib.

İnfeksionist bildirib ki, karantin qaydalarına əməl olunmaması koronavirusa yoluxanların sayının artması ilə nəticələnir:

"COVİD-ə yoluxanların sayının daha da artıb-artmayacağını zaman göstərəcək. Amma nəzərə alsaq ki, payız, qış aylarıdır, mövsümi dəyişiklik baş verir, havanın temperturu kəskin olaraq aşağı enir, təbii ki, bu da orqanizmin immunitetinə təsir göstərir. Buna görə də infeksion xəstəliklərə qarşı orqanizmin həssaslığı artır.

Üstəlik də sosial məsafənin qorunmaması, tibbi maskadan düzgün istifadə olunmaması, əllərin gigiyenasına əməl olunmaması koronavirusa yoluxanların sayının artacağına zəmin yaradır. 

Maskadan düzgün istifadə olunmur

Yoluxmada kritik artımın əsas məsuliyyəti insanların üzərinə düşür. Yoluxmanın hansı səviyyədə olması sadə vətəndaşlardan asılıdır. Biz əgər qaydalara əməl edəriksə, yoluxmanın da qarşısını nisbətən ala bilərik. Son vaxtlar fikir verirəm ki, maskadan düzgün istifadə olunmur.

Bəzən maskanı elə taxırlar ki, burun çöldə qalır və yaxud da parça maskalardan çox istifadə edirlər. Hansı ki, parça maskalar heç də həmişə cərrahi maskaların effektini vermir. Nəfəsalma daha rahat olduğu üçün parça maska taxdıqlarını deyirlər, amma təbii ki, o qorumur. Bu cür nüanslara diqqət yetirilməməsi COVİD-ə yoluxanların sayını daha da artırır. 

İnsanlar qidalarına xüsusilə diqqət yetrisinlər

Fikrimcə, sərtləşdirilmiş karantin rejiminə ehtiyac yoxdur. Çünki qaydalara əməl olunsa zatən buna ehtiyac qalmayacaq. Yenə deyirəm, payız, qış vaxtıdır. İnsanlar özləri immunitetlərini yüksəltmək üçün qidalarına xüsusilə diqqət yetrisinlər, bol mer-meyvə yesinlər, tərəvəz qəbul etsinlər, su içsinlər, açıq havada daha çox vaxt keçirsinlər, yuxu rejiminə düzgün diqqət yetirsinlər. Təbii ki, bunlar bir qədər də olsa həm xəstələnmənin sayını azaldacaq, həm də yoluxma sayını azaltmış olacaq".

Təhməz Əsədov
Milli.Az