Bir neçə gün bundan əvvəl Transnistriyanın qondarma "paytaxtı" Tiraspolda növbəti təxribatçı tədbir - heç kəs tərəfindən tanınmamış "Dnestryanı Moldova Respublikası"nın 30 illiyi şərəfinə dəbdəbəli təntənələr təşkil edilib. Bu tədbirin bir sıra şübhəli (konkret halda isə məhz şübhəsiz) iştirakçıları arasında qondarma "Dağlıq Qarabağ Respublikası"nın "Milli Məclisinin spikeri" Artur Tovmasyanın başçılığı ilə nümayəndə heyəti də iştirak edirdi. NewsRu.md saytında dərc edilmiş "Ermənistan Moldovaya arxadan zərbə endirib" sərlövhəli məqalə bu barədədir.
Milli.Az AZƏRTAC-a istinadən həmin məqaləni təqdim edir.
"Təyini-müqəddərat" və başqa gəlişigözəl sözlərlə zəif maskalanmış sərhədlərin güclə dəyişdirilməsi nə demək olduğunu Moldova ictimaiyyətinə izah etməyə yəqin ki, ehtiyac yoxdur. Hələ Transnistriyanı Moldovadan qoparmaq üçün göstərilən ilk cəhdlərdən əvvəl Ermənistan Azərbaycanın Qarabağ bölgəsinə iddia edirdi. 1992-1993-cü illərdə keçmiş SSRİ məkanındakı ölkələr mövcud sərhədlər daxilində tanındığı vaxt Ermənistan Azərbaycan ərazilərinin 20 faizini işğal edərək onun vətəndaşlarının orta hesabla hər 7 nəfərindən birini, toplam 1 milyon insanı qaçqına çevrilib.
Lakin bu gün söhbət başqa məsələ - Moldova dövlətinin əzəli maraqları barədədir.
İlk növbədə qeyd etməliyik ki, bu cür separatist qurumlar heç də vakuumda mövcud deyil. Qarabağ separatçılarından (əgər "işğalçı rejim" ifadəsi kiminsə qulağına xoş gəlmirsə onları belə də adlandırmaq olar) ibarət nümayəndə heyətlərinin Tiraspola səfər etmələri ilk dəfə deyil. Onların oraya hansı yollarla gedib çıxması da maraqlıdır. Bu faktı unudanlara xatırladaq ki, Transnistriyaya iki yolla getmək olar: ya Ukraynadan, ya da Moldova Respublikasının rəsmi sərhədindən keçməklə. Bizdə olan məlumata görə, Qarabağdan olan erməni separatçıların nümayəndə heyəti bu dəfə Ukrayna sərhədindən keçib. 2016-cı ildə isə, həmin nümayəndə heyəti Tiraspola Kişinyovdan gəlmiş və geri qayıdanda Ukraynadan keçmişdi.
Daha maraqlı məqam Tiraspoldan olan nümayəndələrin cavab səfərləridir. Onlar tanınmamış "DQR" ərazisinə dəfələrlə, özü də Yerevandan səfər ediblər.
İndi isə bir qədər "diplomatik bürokratiya". Belə separatist qurumların hamısı "təyini-müqəddərat" barədə mühakimə yürütməyi və özlərini "müstəqil dövlətlər" kimi qələmə verməyi xoşlayırlar, əslində isə onlar yalnız işğalçı oyuncaq rejimlər kimi mövcuddur. Heç kəs üçün sirr deyil ki, qondarma Dağlıq Qarabağ Respublikasının arxasında Ermənistanın rəsmi hakimiyyət orqanları dayanır. Bir məqama diqqət yetirmək kifayətdir ki, ATƏT-in şəxsində dünya birliyi Qarabağda münaqişənin tərəfləri kimi Azərbaycanı və Ermənistanı müəyyən edib və Ermənistan-Azərbaycan Dağlıq Qarabağ münaqişəsinin dinc yolla nizamlanmasına dair danışıqlar rəsmi Yerevan ilə rəsmi Bakı arasında aparılır.
Artur Tovmasyan tipli personaların "müstəqilliyi"nə inanmaq heç cür mümkün deyil. Deməli, qondarma "Dağlıq Qarabağ Respublikası"nın "Milli Məclisinin spikeri" Artur Tovmasyanın başçılığı ilə "DQR" nümayəndə heyətinin Transnistriyaya səfəri, əvvələn, beynəlxalq hüququn əsas norma və prinsiplərinə ziddidir. İkincisi, bu, Ermənistan tərəfindən açıq-aşkar düşmənçilik addımı, daha dəqiq desək Moldovanın kürəyinə zərbədir. Bu fakt ən azı heyrət doğurur. Gəlin realist olaq: Ermənistan nümayəndə heyətinin Moldovanın qanuni hakimiyyət orqanlarının nəzarəti altında olmayan ərazilərə nümayişkaranə şəkildə səfər etməsi, Moldova hakimiyyət orqanlarının xəbəri olmadan başqa dövlətin sərhədindən keçərək Transnistriyaya gəlməsi Moldova Respublikasının sərhədlərinə və ərazi bütövlüyünə nümayişkaranə hörmətsizlikdir.
Yerevanda Moldova ilə Ermənistan arasında əməkdaşlıq və tərəfdaşlıqdan, bu iki ölkənin xalqları arasında dostluqdan dəm vurmağı xoşlayırlar, lakin Moldovanın arxasında açıq-aşkar ikili oyun oynanılır. Başqa sözlə desək, ikili standartlar siyasəti yürüdülür. Belə olmasaydı, Azərbaycanın işğal edilmiş Qarabağ bölgəsindən olan separatçılar Tiraspola sadəcə gedib çıxa bilməzdi.
Bütün bunlar o deməkdir ki, Moldovanın rəsmi hakimiyyət orqanları Yerevanın bu cür hoqqabazlıqlarına artıq bu gün münasibət bildirməlidirlər. Daha dəqiq desək, bunu hələ dünən, özü də sərt ssenari üzrə etməli idilər.
Milli.Az