Norveçdə Azərbaycanın dövlət müstəqilliyini bərpa etməsinin 20-ci ildönümünə həsr olunmuş tədbir keçirilib
9 Dekabr 2011 15:18
Norveçin Oslo və Stavanger şəhərlərində Azərbaycanın dövlət müstəqilliyini bərpa etməsinin 20-ci ildönümünə və Norveç Azərbaycanlıları Gənclər Təşkilatının (NAYO) yaranmasının beş illiyinə həsr olunmuş tədbir keçirilib. Diasporla İş üzrə Dövlət Komitəsindən AzərTAc-a bildiriblər ki, Norveç Azərbaycanlıları Gənclər Təşkilatı tərəfindən Azərbaycanın Gənclər və İdman Nazirliyinin dəstəyi ilə məşhur Oslo Konserthaus mədəniyyət sarayında keçirilən tədbirdə NAYO-nun sədri Ramil Əliyev ötən beş ildə təşkilatın əldə etdiyi uğurlar haqqında danışıb.
R.Əliyev yubiley tədbirlərinin Oslo ilə yanaşı, Avropanın neft paytaxtı adlandırılan Stavenger şəhərində də keçirilməsini NAYO-nun Norveçin müxtəlif şəhərlərində fəaliyyət göstərən nümayəndəliklərinin uğurlu fəaliyyətinin bariz nümunəsi olduğunu söyləyib.
Oslonun meri Fabian Stanq, Türkiyənin Norveçdəki səfiri Həyati Güvən, Kon-Tiki muzeyinin idarə heyətinin sədri Tur Heyerdal, Norveçin Azərbaycandakı keçmiş səfiri Con Ramberq, Oslo şəhər məclisinin üzvləri Mertefe Bartınoğlu və Gülay Kutal çıxış edərək müstəqilliyimizin bərpasının 20-ci ildönümü və NAYO-nun yaranmasının beş illiyi münasibətilə təbriklərini çatdırmışlar. Natiqlər Azərbaycan ilə Norveç arasında əlaqələrin inkişafından məmnunluqlarını bildiriblər.
Tədbirin bədii hissəsində Azərbaycanın və Norveçin tanınmış musiqiçilərinin ifaları maraqla dinlənilib.
Norveçin məşhur skripkaçısı Halvard Byörgum Azərbaycanın əməkdar tarzəni Sahib Paşazadə ilə bir səhnəni bölüşərək "Heyratı" muğamını və "Tello" xalq mahnısını maraqlı kompozisiyada ifa ediblər.
Milli.Az