Milli.Az Lent.az-a istinadən oxucularına növbəti maraqlı resepti təqdim edir.
Bu dəfə sizi sosial şəbəkədə "Ağababa Ağababa" adı ilə məşhur olan səhifəyə istinadla limonlu tortun necə hazırlanması ilə tanış edəcəyik.
Tərkibi:
Xəmir üçün 550 qram un, 150 qram şəkər tozu, 2 yumurta, 100 ml süd, 90 ml bitki yağı, 1 xörək qaşığı limon suyu, 1 silə çay qaşığı soda, çay qaşığının ucunda duz, vanil.
Krem üçün, 1 litr süd, 2 yumurta, 200 qram şəkər tozu, 200 qram un, 200 qram kərə yağı, 1 limonun qabığının rəndəsi, 2 orta boy limonun suyu, vanil.
Üstü üçün: 1 orta boy limon və nanə yarpağı.
Hazırlanması üçün:
Xəmiri hazırlamaq üçün qaba şəkər tozunu, yumurtanı, südü, günəbaxan yağını, vanili və duzu əlavə edib mikserlə çalırıq. Sonra limon suyunu stəkanda soda ilə həll edib qarışıma əlavə edirik. Unu əlavə edib xəmiri yoğurduqdan sonra 15-20 dəqiqə soyuducuya qoyub kremi hazırlayırıq.
Krem üçün südün yarısını isidirik. Digər bir qabda isə şəkər tozunu, yumurta ilə çalırıq. Sonra içərisinə unu və südü əlavə edib qarışdırırıq. Rəndələnmiş limonun qabığını əlavə edirik və isitdiyimiz südü töküb qarışdıra-qarışdıra bişiririk. Krem soyuduqdan sonra içərisinə vanili əlavə edirik, limonun şirəsini və kərə yağını əlavə edib mikserlə çalırıq.
Xəmiri soyuducudan çıxarıb bərabər hissələrə ayırırıq və oxlovla yayıb üzərini deşdəkləyib 180-200 dərəcəli sobada 8-9 dəqiqə bişiririk. Tort bişdikdən sonra lavaşları kremləyirik. Sonuncu qatı kremlədikdən sonra zövqə uyğun bəzəyirik. Üzərinə isə limon dilimini və nanə yarpağını qoyub servis edirik.
Nuş olsun!