Pentaqon rəhbəri istefa verdi - İllər öncə arvadından şiddət görüb

19 İyun 2019 19:00

Ötən ilin dekabrından ABŞ-ın Müdafiə naziri vəzifəsini icra edən Patrik Şanahan iyunun 24-də vəzifəsindən gedəcək.

Milli.Az qafqazinfo-ya istinadən xəbər verir ki, bu barədə ABŞ Prezidenti Donald Tramp tvitter mikrobloqunda məlumat verib.

Onun sözlərinə görə, Pentaqon rəhbərliyinə namizədliyindən imtina edən Şanahan vəzifəsini 23 iyun daxil olmaqla icra edəcək. İyunun 24-də isə bu posta Ordu naziri Mark Esper müvəqqəti rəhbərlik edəcək.

Dövlət başçısı Şanahanın istefaya getməsini ailəsi ilə daha çox vaxt keçirmək arzusu ilə əlaqələndirib. Lakin "USA Today" qəzeti onun Pentaqona rəhbərlikdən imtina etməsini ailəsində baş vermiş məişət qalmaqalı ilə bağlayıb. Söhbət 2010-cu il avqustun 28-də baş vermiş hadisədən gedir. Belə ki, Şanahan və həyat yoldaşı o zaman bir-birini fiziki şiddətdə ittiham edib. Hazırda sözügedən insidenti Federal Təhqiqatlar Bürosu araşdırır. Bu məsələ isə KİV-də yeni ortaya çıxdığından o, postundan getmək qərarına gəlib.

Qeyd olunur ki, Trampın tvitindən bir neçə dəqiqə sonra "Washington Post" nəşri Şanahandan bir neçə il öncə aldığı müsahibəni yenidən dərc edib. Orada eks-nazir 2011-ci ildə 17 yaşlı oğlunun anasını beysbol taxtası ilə başından vuraraq parçaladığını etiraf edib. O, yaxşı ata olmağı Müdafiə naziri olmaqdan çox istədiyini qeyd edib.

Milli.Az