"Qəbələ" ilə oyuna ciddi hazırlaşacağıq" - Qurban Qurbanov

9 Fevral 2019 21:44

"Futbolçularımızı təkcə qələbəyə yox, xarakterə görə təbrik edirəm. Çətin səfər oyunu idi. Burada futbol adına həm meydan, həm də azarkeşlər baxımından hər şey xoş idi".

"Report"un məlumatına görə, bunu "Qarabağ"ın baş məşqçisi Qurban Qurbanov səfərdə "Sumqayıt"a 2:0 hesabı ilə qalib gəldikləri Topaz Premyer Liqasının XVI tur matçından sonra mətbuat konfransında deyib.

Daha sonra 47 yaşlı mütəxəssis jurnalistlərin suallarını cavablandırıb...

"Sumqayıt"ın ikinci hissədəki oyunu sizi təəccübləndirmədi?

- İki hücumçu gözləyirdik. Amma bir hücumçu ilə oynadılar.

Fasilədən sonra komandanızın arxayınlaşdığını düşünmürsünüz?

- Deməzdim ki, arxayınlaşdıq. Sadəcə, ikinci qoldan sonra bu, ola bilsin, hiss olundu. İkinci hissədə rəqibin heyətində 2 dəyişiklikdən sonra rəqib fəallaşdı. Komandam qələbə qazanmaq üçün çox əziyyət çəkdi.

Şahrudin Məhəmmədəliyevin oynamaması nə ilə əlaqədar idi?

- Qətiyyən "Neftçi" ilə oyuna görə deyildi. Sadəcə, dünən məşqdə diz nahiyəsindən zədə almışdı.

Mahir Mədətov nə zaman oynaya biləcək?

- Bu gün fərdi məşq edirdi. Bir neçə günə komandaya qoşula biləcək.

İlk qolda mübahisəli durum yarandı. Həmin epizodu necə qarşıladınız?

- Mübahisəli bir şey yox idi. Özüm də qolun olduğunu gördüm və soyuqqanlı qarşıladım. Baş hakim də görmüşdü. Ola bilsin, yan xətt hakimi başqa fikirdə idi. Futbolçular bu zaman ona VAR sistemi göstərdilər (gülür).

Növbəti tur "Qəbələ"yə qarşı oynayacaqsınız...

- Çətin rəqibə qarşı oynayacağıq. Mövsümün ikinci yarısına daha ciddi hazırlaşdıqları görünür. Futbolçulara iki gün istirahət verdikdən sonra oyuna ciddi hazırlaşacağıq. Hər bir rəqib bir-birini yaxşı tanıyır. Asan oyun keçməyəcək.

Reynaldonun durumu sizi qane edir?

- Hələ ki, yox. Son 3 məşqdə iştirak edib. Hər şey yaxşılığa doğru gedir. Tədricən daha yaxşı performansda olacağını düşünürəm.

Milli.Az