Okeanı “ağıllı” yelkənlər təmizləyəcək

16 Sentyabr 2018 13:04

Avialaynerlər və digər uçan aparatların hazırlanması ilə məşğul olan Fransanın "Airbus" şirkəti dəniz yük daşınmaları üçün "Airseas" bölməsi yaradıb.

"Qafqazinfo" "Technote"yə istinadən xəbər verir ki, şirkət dəniz səyahətlərini daha effektiv etməyə, eyni zamanda okeanın çirklənməsini azaltmağa imkan verən "ağıllı" yelkənlər təqdim edib.

"Airbus"ın dəniz yük daşınmalarının çox hissəsi ABŞ və Avropa arasında şirkət təyyarələrinin daşınmasına cəmlənib.

Bu yük gəmilərinə hər birinin sahəsi 1000 kvadrat metr təşkil edən yeni "ağıllı" yelkənlər quraşdırılacaq. Yelkəndən istifadə küləyin əlavə hərəkət qüvvəsi hesabına yanacağın istehlakını aşağı salacaq. Beləliklə, okeana atılan yanacağın tullantılarının miqdarını, nəticə etibarilə dənizin flora və faunası üçün təhlükəli karbon izlərini əhəmiyyətli dərəcədə azaldacaq.

"Ağıllı" yelkənin daxilində yelkənlərin açılması üçün uyğun zamanı və yeri müstəqil müəyyən edən tənzimləyici və sensorlar dəsti qurulub. Yelkən açıldıqdan sonra hava şəraiti, küləyin gücü və istiqamətini nəzərə alaraq gəminin hərəkətinə kömək etməyə başlayır. Yelkənin açılması və lazım olmadıqda bağlanması prosesində insan əməyindən istifadə olunmur. Sistem tamamilə avtonomdur.

Qeyd edək ki, "Airbus" 2030-cu ilədək böyük ticarət gəmilərinin minimum 10 faizində bu kimi yelkənlər quraşdırmağı planlaşdırır. Mütəxəssislərin hesablamalarına görə, yelkəndən istifadə ümumi xərclərə il ərzində 20 faizə qədər qənaət etməyə imkan verəcək.

Milli.Az