Azarkeş: "Yaxşı haldır ki, Azərbaycanda Avropa çempionatı kimi mötəbər idman tədbiri keçirilir"

13 Aprel 2018 19:00

Çox yaxşı haldır ki, ölkədə batut gimnastikası, ikili mini-batut və tamblinq üzrə XXVI Avropa çempionatı kimi mötəbər idman tədbiri keçirilir.

Milli.Az bildirir ki, bunu Trend-ə  azarkeş Şəlalə Namazova deyib.

Azarkeş deyib: "Mən nəvəmi və onun dostunu yarışlara baxmağa gətirmişəm, onlar da artıq 1 ildir ki, gimnastika ilə məşğul olurlar. İstəyirəm ki, onlar müxtəlif ölkələrdən olan idmançıları, məşhur çempionları canlı görsünlər, hesab edirəm ki, bu, onlara gələcəkdə idmanla daha məhsuldar məşğul olmağa və məqsədlərinə doğru inamla irəliləməyə yardım edəcək".

Ş.Namazova azarkeşlər üçün hər cür şəraitin yaradıldığını xüsusi vurğulayıb.

Azarkeş əlavə edib: "Gimnastika arenası çox gözəldir, idmançıların çıxışları çox maraqlıdır, müsbət əhval-ruhiyyə var".

Qeyd edək ki, Bakıda batut gimnastikası, ikili mini-batut və tamblinq üzrə Avropa çempionatı davam edir. Milli Gimnastika Arenasında keçirilən sayca 26-cı olan bu çempionatda həm böyüklər, həm də gənclər proqramında 25 ölkədən hər 3 növ üzrə 400-dən idmançı mübarizə aparır.

Gimnastlar üçün doğma məkana çevrilmiş arenada aprelin 15-dək davam edəcək turnir özündə 4 növ yarışları - fərdi batut, sinxron batut, tamblinq və ikili mini-batutu birləşdirir.

Ötən gün Azərbaycan gimnastı Mixail Malkin tamblinq yarışlarında finala yüksəlib.

Azərbaycanı İlya Qrişunin, Ruslan Ağamirov, Tofiq Əliyev, Fərid Mustafayev, Elnur Məmmədov, Veronika Zemlyanaya, Svetlana Makştarova və Selcan Maqsudovanın təmsil etdiyi yarışların 2-ci günündə həm gənclər, həm də böyüklər arasında bütün növlər üzrə təsnifat mərhələləri və komandalar arasında finallar keçirilir.

Aprelin 14-də isə gimnastlar (gənc və böyük) sinxron və fərdi proqramda təsnifat mərhələlərində çıxış edəcəklər. Avropa və dünya çempionatlarının formatına əsasən fərdi proqramda təsnifat 2 mərhələdən ibarət olduğundan, çempionat çərçivəsində batut gimnastikası üzrə fərdi yarışlarda finaldan öncə, ilk mərhələdə yaxşı nəticə göstərmiş 24 idmançı arasında yarım-final mərhələsi də baş tutacaq. Turnirin son günü isə hər 4 növ üzrə finallarda (fərdi batut, sinxron batut, tamblinq və ikili mini-batut) medalçıların adları məlum olacaq.

Bu Avropa çempionatının əsas özəlliyi isə odur ki, gənc gimnastlar 2018-ci ildə baş tutacaq Gənclər arasında Olimpiya Oyunlarına, böyük gimnastlar isə 2019-cu ilin Avropa Oyunlarına lisenziyanı məhz Bakıda əldə edə biləcəklər.

Milli.Az