Azərbaycanlı sənətçi Oslo terroruna mahnı həsr etdi - VİDEO
20 Avqust 2011 13:10
İyulun 22-də Norveçin paytaxtı Oslonun mərkəzində və bir adada baş verən üzücü olaylarla əlaqədar bir çox sənətçi terrora qarşı mahnılar hazırladı. Norveçdə yaşayan həmvətənimiz Şervin Nəcəfpurun ANS PRESS-ə verdiyi məlumata görə, bu sənətçilər arasında əslən Cənubi Azərbaycandan olan təbrizli Məmməd Rza da var.
Məmməd Rza Norveç xalqının kədərinə ortaq olub bir mahnı hazırlayıb. Mahnının sözlərini norveçli şair Gəyr Uthauq yazıb. Mahnının adı "Blomster mot død", Azərbaycan dilinə tərcümədə "Ölümü çiçəklə qarşılayırıq" deməkdir.
Xatırladaq ki, iyulun 22-də Oslonun mərkəzində və hakim Norveç Fəhlə Partiyasının Utoyya adasındakı gənclər düşərgəsində baş vermiş iki terror aktı nəticəsində 77 nəfər ölüb. Hadisəni törədən Anders Breyvik terrorçuluq fəaliyyətində ittiham olunur və onu 21 ilədək həbs cəzası gözləyir.