Azərbaycanda vahid məktəbli formasını haradan almaq olar? - REPORTAJ - FOTOSESSİYA
15 Avqust 2011 17:53
Amma tədbirli valideynlər artıq hazırlıqlara başlayıb. Ötən ildən başlayaraq, məktəbə hazırlaşanların əsas işi vahid məktəbli forması almaqdır. Vəziyyətlə tanış olmaq üçün üz tutduq, vahid məktəbli formasının tikintisi ilə məşğul olan "Bakı Tikiş Evi" ASC-yə.
ASC-nin satış şöbəsinin rəisi Etibar Əzimov Anspress-ə bildirib ki, fabrik bu il formaların satışı zamanı basabasın olmaması üçün "BTE məktəbli dünyası" mağazalarının Bakıda 12 filialı açılıb.
Vahid Məktəbli Formasını haradan almaq olar?
Bakıxanov qəsəbəsi M.Fətəliyev küçəsi 17.
Binəqədi rayonu 8-ci mikrorayon Azadlıq prospekti 185.
Nəsimi rayonu, Mərdanov qadaşları 113.
Nəsimi rayonu, Alı Mustafayev 3014.
Nizami rayonu Şirin Mirzəyev küçəsi 65.
Yasamal rayonu Həsən Bəy Zərdabi 55.
Xəzər rayonu, Binə qəsəbəsi, Kolxoz küçəsi 1.
Xəzər rayonu Buzovna qəsəbəsi.
Xətai rayonu Fəhlə prospekti.
Qaradağ rayonu Sahil qəsəbəsi.
Qaradağ rayonu Qızıldaş qəsəbəsi.
Sabunçu rayonu Maştağa qəsəbəsi 11.
"Yeni mağazaların açılması bəzi işbazların "bazarını" öldürəcək. "Yadnızdadırsa, keçən il kimsə saxta məktəbli forması gətirib satmışdı. Onlardan şagirdlərə allergik xəstəliklər keçmişdi. Ona görə də, işə Təhsil, Səhiyyə nazirlikləri və digər dövlət qurumları qarışdı. Direktor da cəzalandı", deyə E. Əzimov bildirdi.
Qeyd edək ki, I-VI siniflər üzrə məktəbli formaları artıq ötən ildən satıldığından onlara tələbat elə də çox deyil. Lakin VII-XI siniflər üzrə vahid məktəbli forması bu il tətbiq olunduğundan onlara tələbat daha çoxdur.
Vahid məktəbli formalarının qiymətlərində artım varmı?
Qiymətlərə gəlincə, vahid məktəbli formalarının qiymətində heç bir artım yoxdur. Qiymətlər formaların ölçülərinə görə dəyişir. I-VI siniflər üzrə 26-38 ölçülü geyimlərin qiyməti 40, 40-42 ölçülü formaların qiyməti isə 45 manatdır. I-VI sinif şagirdləri üçün tək kostyumların qiyməti 26-38 ölçülü 30 manat, 40-44 ölçülü kostyumların qiyməti isə 35 manatdır. Yuxarı sinif şagirdləri üçün isə formaların qiyməti nisbətən bahadır. VII-XI siniflər üçün 36-48 ölçülü formaların qiyməti 53 manat, 50-52 ölçülü formaların qiyməti isə 55 manatdır. Bu sinif şagirdləri üçün tək kostyumların qiyməti 38-48 ölçülər üçün 40, 50-54 ölçülü isə 42 manatdır.
Vahid məktəbli formalarının ölçülərində problemlər yaranıb
"Bakı Tikiş Evi" rəsmisinin sözlərinə görə, məktəbli formalarının satılmasında böyük əngəllər yaranır. Çünki, formaların ölçüləri uşaqların ölçüləri ilə uyğun gəlmir.
"Formaların ölçüləri uyğun gəlməyəndə müştəriləri bizim əsas mağazamıza (Nəsimi rayonu, Mərdanov qardaşları 113 red.) göndərirlər. Biz də şagirdin ölçüsünü götürüb, xüsusi geyim şöbəsində sifariş veririk. Geyim sifariş verildikdən təxminən 10 gün sonra hazır olur", deyə E. Əzimov qeyd etdi.
Əgər ölçü daha böyük olarsa və forma üçün əlavə parça işlənərsə, burada qiymət də dəyişir. Sifarişçi bunun üçün təxminən 5-8 manat əlavə pul ödəməli olur. Etibar Əzimovun sözlərinə görə, son günlər əsasən qızların ölçüləri uyğun gəlmir: "Hərdən valideynlərə irad da tuturam ki, qızları çox kökəlməyə qoymasınlar. Bir də görürsən ki, VI sinif şagirdi olan qızın ölçüsü 50 olur. Ona görə də, onun üçün xüsusi sifariş verməli oluruq".
Elə mağazada olduğumuz zaman VI sinif şagirdi olan Ülkər Eminli də valideyni ilə birlikdə vahid məktbəli forması almağa gəlmişdi. Lakin onun da əyninə gələn forma tapılmadığı üçün "Bakı Tikiş Evi"nin xüsusi geyim sahəsinə müraciət etməli oldu.
"Əynimə gələn geyim tapmadığımı üçün xüsusi forma sifariş verməyə məcburam", söyləyən Ülkər bizimlə birgə xüsusi geyim sahəsinə müraciət etdi. Ülkərin bədəni ölçüldü və məktəbli forması sifariş edildi. 46 ölçülü paltar sifariş edən Ülkər əlavə olaraq 8 manat ödəyəcək. Onun forması 10 gündən sonra hazır olacaq.
Xüsusi geyim sahəsinin sex rəisi Rəşad Əhmədovun sözlərinə görə, gün ərzində onlara ölçüləri uyğun olmayan 30-35 şagird müraciət edir. Sifarişlər çox olduğundan formaların çatdırılmasında da gecikmələr istisna edilmir.
Anspress vahid məktəbli formalarının hazırlanma prosesindən fotoreportaj təqdim edir.
Sonda bütün şagirdlərə yeni tədris ilində uğurlar arzulayırıq. Ümid edirik ki, bu il ötən il olduğu kimi vahid məktəbli formaları mövzusunda problem yaranmayacaq.
Milli.Az
