Dağlıq Qarabağ münaqişəsi sülh danışıqları yolu ilə həll olunmalıdır.
Milli.Az Trend-ə istinadən xəbər verir ki, bunu jurnalistlərə V Qlobal Bakı Forumunda iştirak edən Qırğızıstanın keçmiş baş naziri Apas Jumaqulov deyib.
O bildirib ki, bu münaqişənin həll olunmasl üçün hər şey edilməlidir.
Sabiq baş nazir İqtisadi Əməkdaşlıq Təşkilatının (İƏT) İslamabadda keçirilən sammitində Qırğızıstanın yekun bəyanata səs verməməsinə münasibət bildirərək deyib: "Ola bilsin elə məsələlər olub ki, orada olan insanlar öz üzərlərinə götürüb, həll edə bilməyiblər".
Qeyd edək ki, martın 16-da Azərbaycan paytaxtında "Beynəlxalq münasibətlərin gələcəyi: güc və maraqlar" mövzusuna həsr olunan V Qlobal Bakı Forumu öz işinə başlayıb. Diasporla İş üzrə Dövlət Komitəsinin və Nizami Gəncəvi Beynəlxalq Mərkəzinin təşkilati dəstəyi ilə keçirilən forumda Bosniya və Hersoqovina, Latviya, Makedoniya, Albaniya, Monteneqro və Gürcüstanın dövlət başçıları iştirak edirlər.
V Qlobal Bakı Forumunda bir sıra ölkələr Baş nazir və müavinləri, parlament rəhbərləri səviyyəsində təmsil olunur. Ümumulikdə isə forumun işində 50 ölkədən 260-dan çox qonaq - nüfuzlu ictimai-siyasi xadimlər, elm adamları və ekspertlər iştirak edir. Forum çərçivəsində panel müzakirələri təşkil olunur. Panellərdə terrorizmə qarşı mübarizənin yolları, müasir beynəlxalq münasibətlərin nizama salınmasında ittifaqların qurulması zərurəti, beynəlxalq münasibətlərdə Çinin rolu, ekstremizm və populizmin beynəlxalq təhlükəsizlik üçün təhdidləri, Baltik-Qara dəniz təhlükəsizlik icmasının yaradılması ilə bağlı geniş müzakirələr aparılır.
Milli.Az