Sifarişli qətllərdə ittiham olunan iş adamının məhkəməsi başlayır

9 Mart 2010 18:13
Bu barədə Paş Prokurorluq və Daxili İşlər Nazilrliyi birgə məlumat yayıb.

Müəyyən edilib ki, 2003-cü ilin dekabrında Şöhrət Quliyev Mehman Qəhrəmanovla birgə Anar Həsənov, Səxavət Xudiyev, İlham Şabanov, Xəzər Kazımov və Elmar Qasımovdan ibarət silahlı mütəşəkkil dəstə yaradaraq onu odlu silah və döyüş sursatı ilə təchiz ediblər. Ş.Quliyev cinayətkar dəstənin üzvlərinə Bakıda sahibkarlıqla məşğul olan Əhməd İbrahimovun öldürülməsini tapşırmış və bunun müqabilində onlara 25.000 ABŞ dolları məbləğində pul mükafatı verəcəyini vəd edib. Sonuncunun Bakıda yaşadığı ünvanı, işdən evə qayıtma vaxtını və marşrutunu müəyyənləşdirən cinayətkar dəstənin üzvü A.Həsənov 2003-cü il dekabrın 18-də Əhməd İbrahimova yaşadığı binanın girişində "Makarov" markalı tapançadan atəş açaraq onu öldürüb. Cinayətin aləti olan "Makarov" tapançası həmin il dekabrın 27-də Bakı şəhəri B.Nuriyev küçəsi 32 saylı binanın yaxınlığındakı bağ sahəsindən tapılaraq götürülmüş və ekspert rəyi ilə hadisə yerində aşkarlanmış güllə və gilizlərin qeyd olunan tapançadan atılması təsdiqlənib.
Ş.Quliyev, mütəmadi olaraq ondan pul tələb edən Gəncə sakini Kamal Ələkbərovun öldürülməsini də sifariş verərək bununla əlaqədar cinayətin icraçılarına 25.000 ABŞ dolları pul mükafatı vəd edib. 2004-cü il martın 22-də  "Makarov"la silahlanmış cinayətkar dəstənin üzvü İlham Şabanov K.Ələkbərovu yaşadığı evin qarşısında qətlə yetirib.

İstintaqla cinayətin aləti olan tapançanı dəstənin digər üzvü Elmar Qasımovun Gəncə şəhərindəki idman klubunun işçisi Məharət İsmayılovdan  600 ABŞ dollarına alması  müəyyən edilib və həmin silah 2009-cu il mayın 26-da dəstə üzvü İlham Şabanovun Gəncə şəhərində yaşadığı evin həyətində basdırdığı yerdən götürülüb. Ekspert rəyi ilə hadisə yerində aşkar edilmiş gilizlərin və Kamal Ələkbərovun meyitindən çıxarılmış güllələrin həmin silahdan atılması  təsdiqlənib.

İstintaq prosesində o da müəyyən olunub ki, cinayətkar dəstənin üzvləri Gəncədə fəaliyyət göstərən Xəzər Kazımova məxsus "Quş südü" adlandırılan kafedə mütəmadi yığışaraq törədəcəkləri cinayətlərin plan və detallarını müzakirə edib, eləcə də narkotik vasitələrin istehlak və satışını həyata keçirib. 2009-cu ilin iyununda kafedə aparılmış axtarış zamanı X.Kazımov tərəfindən qanunsuz əldə edilib kafenin zirzəmisində gizlədilmiş "Kalaşnikov" avtomatı, 30 ədəd patron, habelə Rabit Abdinovun üzərindən Mehman Qəhrəmanovdan 250 manata aldığı narkotik vasitə olan heroin aşkar edilərək götürülüb.

Şöhrət Quliyev, Mehman Qəhrəmanov, İlham Şabanov, Anar Həsənov, Səxavət Xudiyev, Xəzər Kazımov, Məharət İsmayılov, Rabit Abdinov, Elim Şahmuradov, Bilal Verdiyev,  Nuru Atayev və İlahibə Ələsgərovun Cinayət Məcəlləsinin 120 (Qəsdən adam öldürmə), 217 (Banditizm) və   228 (Qanunsuz olaraq odlu silah, sursat əldə etmə və saxlama) və digər maddələri ilə təqsirləndirilmələrinə dair cinayət işinin istintaqı tamamlanaraq baxılması üçün Ağır Cinayətlərə dair İşlər üzrə Azərbaycan Respubilkası Məhkəməsinə göndərilib.

Milli.Az