MTN-in idarə rəisi: “Ötən il transmilli mütəşəkkil cinayətkarlıqla mübarizə istiqamətində uğurlu əməliyyatlar həyata keçirilib" - FOTO
16 Mart 2011 16:28
Milli Təhlükəsizlik Nazirliyinin ictimaiyyətlə əlaqələr mərkəzindən Milli.Az xəbər portalına verilən məlumata görə, Azərbaycanın milli təhlükəsizlik orqanlarının yaranmasının 92-ci ildönümü münasibətilə keçirilən tədbirdə iştirakçılar universitetin Heydər Əliyev Muzeyi və Heydər Əliyev Lektoriyası Məktəbi ilə də tanış olub.
MTN tərəfindən Azərbaycan, rus və ingilis dillərində nəşr olunmuş "Heydər Əliyev və milli təhlükəsizlik orqanları" adlı kitablar, həmçinin Ermənistan-Azərbaycan, Dağlıq Qarabağ münaqişəsinə, işğalın nəticələrinin doğurduğu fəsadlara dair müxtəlif dillərdə nəşrlər və broşürlər də universitetə hədiyyə edilib.
Təhsil ocağının akt zalında davam edən tədbiri açan ADPU-nun rektoru, professor Yusif Məmmədov bildirib ki, konfransın işində Milli Təhlükəsizlik və Təhsil nazirliklərinin məsul əməkdaşları, Səbail Rayon İcra Hakimiyyətinin rəhbərliyi, Milli Məclisin deputatları, Bakıda fəaliyyət göstərən digər ali təhsil müəssisələrinin nümayəndələri, universitetin professor-müəllim heyəti və tələbələri iştirak edirlər. Y.Məmmədov bu il ADPU-nun 90 illiyinin keçiriləcəyini və milli təhlükəsizlik orqanlarının 92-ci ildönümü ərəfəsində belə bir tədbirin bu təhsil ocağında təşkilinin əlamətdar hadisə olduğunu qeyd edib.
Rektor milli təhlükəsizlik orqanlarının keçdiyi şərəfli inkişaf yolundan, xalqımızın ümummilli lideri, müstəqil dövlətimizin banisi və qurucusu Heydər Əliyevin bu quruma göstərdiyi diqqət və qayğıdan danışıb.
MTN-in idarə rəisi, polkovnik Məmməd Cəfərli Azərbaycanın təhlükəsizlik orqanlarının yaranma tarixi, inkişaf mərhələləri, dövlətçiliyimizin qorunmasındakı xidmətlərindən danışıb. Bildirib ki, tarixi 1919-cu il martın 28-də Azərbaycan Xalq Cümhuriyyəti dövründən başlayan təhlükəsizlik orqanları çətin, keşməkəşli və eyni zamanda, şərəfli tarixi yol keçib.
İdarə rəisi milli maraqların, dövlətçiliyin daha da etibarlı qorunması istiqamətində Milli Təhlükəsizlik Nazirliyinin son illərdə həyata keçirdiyi uğurlu əməliyyatlardan ətraflı danışıb.
Natiq çıxışında qeyd edib ki, nazirliyin fəaliyyətinin prioritet istiqamətlərindən biri Azərbaycanın ərazi bütövlüyünün bərpası istiqamətində ölkə rəhbərliyinin siyasi kursu üçün əlverişli şəraitin yaradılmasıdır. Bildirilib ki, işğalçı Ermənistan tərəfindən dövlət səviyyəsində dəstəklənən terrorçuluq və təcavüzkar separatçılıqla mübarizənin səmərəsinin artırılması istiqamətində də ardıcıl tədbirlər görülüb. Ölkə ərazisində terrorculuq aksiyalarının törədilməsi cəhdlərinin qarşısı alınıb, bu istiqamətdə aparılan uğurlu əməliyyatlar nəticəsində beynəlxalq terrorçu təşkilatlarla əlaqəli olan bir sıra silahlı birləşmələr və ekstremist qruplar zərərsizləşdirilib.
İdarə rəisi vurğulayıb ki, ötən il transmilli mütəşəkkil cinayətkarlıqla mübarizə istiqamətində də uğurlu əməliyyatlar həyata keçirilib, narkotik vasitələrin qanunsuz dövriyyəsi ilə məşğul olan çoxlu sayda mütəşəkkil cinayətkar dəstə və ayrı-ayrı şəxslər yaxalanıb və cinayət məsuliyyətinə cəlb olunub.
Tədbirdə Səbail İH-nin başçısı Asif Əsgərov, təhsil nazirinin müavini Elmar Qasımov da çıxış ediblər. Tədbirin sonunda MTN-in fəaliyyətinə həsr olunmuş sənədli film nümayiş etdirilib.
Milli.Az
