Milli.Az xəbər verir ki, Avropa Liqasının qrup mərhələsinin 5-ci turunda səfərdə PAOK-la 0:0 bərabərə qalan "Qəbələ"nin hücumçusu Sergey Zenyov qol.az-ın Yunanıstana ezam olunmuş əməkdaşının suallarını cavablandırıb.
- Avropa Liqasının qrup mərhələsində səfərdə PAOK-a uduzmadınız. Qarşılaşma haqda nə deyə bilərsən?
- Məğlub olmaqdansa, heç-heçə pis nəticə deyil. Təbii ki, məqsədimiz qələbə qazanmaq idi. Ancaq sonda 1 xalla kifayətləndik.
- Oyunu qələbə ilə başa vurmaq üçün nə çatmadı?
- Qapıya dəqiq zərbələr endirə bilmədik. Bəzən sonuncu ötürmələrdə dəqiqlik çatmadı. Qol vurmaq üçün bir neçə şansımız olsa da, bundan yararlana bilmədik.
- "Panatinaikos"la pley-off matçında yerli azarkeşlərin çılğınlığının şahidi olmuşduq. Lakin PAOK-un fanatları elə də fəal deyildilər. Bu, sənin üçün sürpriz olmadı?
- Bu məqam məni də təəccübləndirdi. Təxminən 4 il öncə Ukrayna klubunun heyətində PAOK-a qarşı oynamışdım. Həmin vaxt stadion azarkeşlərlə dolu idi. Onlar dayanmadan, 90 dəqiqə ərzində komandalarına dəstək verirdilər. Ancaq bu dəfə belə olmadı. Yəqin ki, azarkeşlərlə klub arasında hansısa problem var.
- PAOK-la oyundan əvvəl artıq "Krasnodar" - "Borussiya" (1:0) matçının nəticəsini bilirdiz. Bu sizin oyununuza nə dərəcədə təsir göstərdi?
- Bunu hiss etdirməməyə çalışırdıq. Biz "Borussiya"nın qələbəsini arzu edirdik. Son tura qədər qrupdan çıxmaq şansımızın qalacağına inanırdıq. Təəssüf ki, istəyimiz baş tutmadı.
- Rəqibiniz necə təsir bağışladı?
- PAOK ilk hissədə yaxşı oyun nümayiş etdirdi. Lakin fasilədən sonra rəqib zəif təsir bağışladı. Bu, yorğunluqla əlaqəli ola bilər.
- Bazar ertəsi Azərbaycan Premyer Liqasında "Rəvan"la qarşılaşacaqsınız. Necə düşünürsən, bu görüşdə qələbəsizlik seriyasına son qoya biləcəksiniz?
- PAOK-a qalib gəlsəydik, bu inamımızı bir qədər də artırardı. Növbəti matçımız evdə "Rəvan"a qarşı olacaq. Bu görüşdə mütləq qələbə qazanmalıyıq. Başqa yolumuz yoxdur. Tam gücümüzlə qarşıdakı matça hazırlaşacağıq.
Milli.Az