Türk müğənni Funda Ararla Miri Yusifin arasında yaşanan qalmaqalda adı hallanan, "Bağışla" mahnısının müəllifi olduğunu bildirən MC Muradın Miri Yusif haqda səsləndirdiyi sərt ittihamlara münasibət gəlib.
Miri Yusifin mətbuat xidmətindən qafqazinfo-ya bildirilib ki, müğənni MC Murad dələduzluq etdiyi və yanlış ittihamlar səsləndirdiyi üçün onu məhkəməyə verəcək:
"Biz MC Muradın video açıqlamasını izlədik. Bu açıqlama Türkiyə tərəfinin məsuliyyəti öz üzərindən atması üçün atılan addımdır. Biz bütün ittihamlara məhkəmədə cavab verəcəyik, bizim davamız Funda Ararladır. Çünki o, sözləri və musiqisi Miri Yusifə məxsus olan "Bağışla" mahnısını icazəsiz oxuyub. Vəkilimiz İstanbulda bununla bağlı iş aparır, orada məhkəmədə hər şey həll olunacaq. MC Muradın ittihamlarının bizim üçün heç bir əhəmiyyəti yoxdur. Ortada dələduzluq faktı var, Murad bəy Azərbaycanda məhkəməyə veriləcək. Məhkəmədə bütün sübutları ortaya qoyacağıq. Onun nə üçün belə bir addım atdığını bilmirik".
Qeyd edək ki, MC Murad "Bağışla" mahnısının müəllifi olduğunu iddia etmişdi. Daha sonra "Youtube" kanalında yerləşdirdiyi videoçarxda Miri Yusifin onun mahnılarını öz adına çıxaraq tamaşaçıları aldatdığını bildirmişdi.
Funda Ararın komandası da məsələyə biganə qalmayıb. Türkiyəli şair, mahnının sözlərini türk dilinə çevirən Günay Çoban mahnının sahibinin Murad Quliyev olduğunu və ondan icazə alındığını bildirmişdi.
Milli.Az