Londonda "Görünməmiş Salahov"
20 Fevral 2010 14:39
Səfirlikdən verilən məlumata görə, "Görünməmiş Salahov" adlı sərgidə tanınmış rəssamın Azərbaycan həyatının müxtəlif çalarlarını təsvir edən 30-dan artıq əsəri nümayiş olunub.
"Sothebys" qalereyasının direktoru Lord Poltimor məşhur rəssamın əsərlərinin Londonda nümayiş olunmasından məmnunluğunu bildirərək, ölkəmizə səfəri zamanı Azərbaycanın zəngin incəsənət irsi ilə tanışlığından danışıb. L.Poltimor Bakının zəngin mədəni həyatı və qədim incəsənət ənənələri ilə yaxından tanış olduğunu və bu gün azərbaycanlı rəssamın əsərlərini Britaniya ictimaiyyətinə təqdim etməkdən xoşbəxt olduğunu diqqətə çatdırıb.
Sonda çıxış edən Tahir Salahov təşkilatçılara minnətdarlığını bildirərək, əsərlərinin Londonda nümayiş etdirilməsindən məmnun olduğunu qeyd edib.
Açılış mərasimində Londonda akkreditə olunmuş səfirlər, diplomatik korpusun üzvləri, britaniyalı sənətsevərlər, bu ölkədə yaşayan Azərbaycan, türk və rus icmalarının nümayəndələri iştirak ediblər.
Sərgi fevralın 25-dək davam edəcək.
/AzərTac/