Bakıda zəncirvari qəzada 3 yaşlı uşaq öldü

22 Noyabr 2014 11:53

Dünən Heydər Əliyev prospektində zəncirvari qəza olub

"Qafqazinfo" Bakı Şəhər BPİ-ə istinadən xəbər verir ki, noyabrın 21-də saat 13:00 radələrində, H.Əliyev prospektində Bakı şəhər sakinləri 1978-ci il təvəllüdlü Gülağa Fərzəliyevin "Renault", 1984-cü il təvəllüdlü Məmməd Nəcəfovun "Mercedes", 1953-cü il təvəllüdlü Əşrəf Həsənovun "Mercedes", 1979-cu il təvəllüdlü Natiq Xəlilovun "Honda", 1977-ci il təvəllüdlü Xəyal Rzayevin "Hyundai", 1968-ci il təvəllüdlü Asəf Eyvazovun idarə etdiyi "Mitsubishi" markalı avtomobillər toqquşub.

Sürücülər M.Nəcəfov, Ə.Həsənov, G.Fərzəliyev və onun sərnişini, 2003-cü il təvəllüdlü Xaliq Rəhimli, "Honda" avtomobilinin sərnişinləri - 1981-ci il təvəllüdlü Nuray Xəlilova, 2014-cü il təvəllüdlü Munisə Xəlilova və bacısı, 2011-ci il təvəllüdlü Surə Xəlilova xəsarət alaraq müxtəlif tibb müəssisələrinə yerləşdirilib.

S. Xəlilova saat 16:30 radələrində xəstəxanada ölüb, digər yaralılar yardım alıb evə buraxılıblar.

Nizami Rayon Polis İdarəsi 23-cü Polis Bölməsi tərəfindən araşdırma aparılır.

Milli.Az