Polad Alemdar qəzaya düşdü... bizimkilər də ona "qoşuldular"

4 Noyabr 2014 15:51

Azərbaycanlı sənətçilərin ilginc qəza hekayələri

"Kurtlar Vadisi Pusu" serialında Polat Alemdar obrazını canlandıran Necati Şaşmaz avtomobil qəzasına düşüb. Məşhur aktyor ötən axşam serialın çəkilişi zamanı özünün idarə etdiyi maşınla qəza törədib. Göztəpədəki özəl klinikalardan birinə yerləşdirilən Şaşmazın çənəsində qırıq aşkarlanıb. Təcili əməliyyat olunan aktyorun vəziyyəti yaxşıdır.

Bu xəbər bizi azərbaycanlı müğənnilərin, aktyorların qəza tarixçəsini yada salmağa sövq etdi.
2012-ci ildə Azərbaycanın tanınmış müğənnisi Natavan Həbibi qəzaya düşüb. Hadisə Novxanı yolunda baş verib. Lider TV-də yayımlanan "Rəngarəng" verilinin çəkilişinə, xalq artisti Nazpəri Dostəliyevanın bağına gedən zaman baş verən qəzada xəsarət alan olmayıb.

Natəvanın sözlərinə görə, günah qarşı tərəfdə olub və problem yerində həll olunub. Hadisə zamanı həmkarı Elnur Məmmədov da Natavanla eyni maşında olub.

2014-cü ilin martında müğənni Ruhəngiz Allahverdiyeva da avtomobil qəzasına düşüb. Hadisə baş verən zaman müğənninin yanında dostları da olublar. R.Allahverdiyeva avtomobil sürməyi öyrənmək istəyirmiş.

Hadisə gecə saatlarında Dərnəgül şossesində olub. Dostu Vəfa Vaqifqızının ağ rəngli "KİA Sportage" markalı avtomobilində qəza keçirən müğənninin vəziyyəti sonradan düzəlib.

Azərbaycanlı müğənni Günay İbrahimli ATV telekanalında yayımlanan "Texnopark" verilişində qəzaya uğrayıb və huşunu itirib. Verilişdə Günay verilişin aparıcısı Zaur Əliyevlə kartinq yarışı keçirib. Ancaq yarış zamanı Günayın idarə etdiyi maşın qəzaya uğrayıb və o, huşunu itirib. Onun üçün təcili yardım da çağırılıb və müğənni xəstəxanaya aparılıb.

Müğənni Elnarə Xəlilova da 33 yaşı tamam olanda qəzaya uğrayıb. Doğum gününü şəhər restoranlarının birində təmtəraqlı şəkildə qeyd edən müğənni məkana gələn zaman avtomobil qəzası keçirib. Müğənninin maşını arxadan vurulub.

Müğənni Elton Hüseynəliyev avtomobil qəzası keçirib. Nəsimi rayonu ərazisində baş verən qəzada ifaçı ciddi xəsarət almayıb.

Maşını döndərərkən əməliyyatı düzgün yerinə yetirə bilməyən Elton onu səkiyə çırpıb. Nəticədə "BMW" markalı avtomobilin qabaq hissəsi yararsız hala düşüb. Sənətçi özü isə maşını orada qoyaraq, hadisə yerindən uzaqlaşıb.

Bakı Bələdiyyə Teatrının tanınmış aktyoru İlqar Musayev avtomobil qəzasına uğrayan məşhurlardandır. Bu ilin avqustunda onun idarə etdiyi 90-HV-733 dövlət nömrə nişanlı "VAZ 2107" markalı avtomobil 90-VN-826 dövlət nömrə nişanlı avtomobillə toqquşub. Nəticədə hər iki avtomobilə ciddi ziyan dəyib. Sürücülərdən heç biri ciddi xəsarət almasa da, aktyor qolunda ağrılar hiss etdiyini bildirib: "Həyətdən təzəcə çıxıb çəkilişə gedirdim. O biri sürücü elə bil ki, təyyarə sürürdü. Qolumda möhkəm ağrılar vardı".

"Yeni Müsavat"