Paytaxtda valideynlər həyəcan təbili çaldılar

3 Noyabr 2014 00:45

Bakıda valideynlər övladlarının təhlükəsizliyi ilə bağlı həyəcan təbili çalıblar. Qaradağ rayonu, Lökbatan qəsəbəsində yaşayan sakinlər övladlarının hər gün ölüm təhlükəsi ilə üzləşməsindən şikayətlənirlər

Sakinlər Milli.Az-a yazırlar ki, Lökbatan qəsəbəsində ən böyük problemlərdən biri piyada keçidinin olmamasıdır. Qəsəbə böyük olduğundan 5 orta məktəb var. Təkcə 106 saylı məktəbə 3000-ə yaxın uşaq gedir. Amma piyadalar üçün yeraltı və ya yerüstü keçidin, işıqforun olmaması hətta böyük şagirdlərin məktəbə gedib-gəlməsində çətinliklər yaradır.

Qaradağ Rayon İcra Hakimiyyətinin sektor müdiri Eldar Sadıqov Milli.Az-a açıqlamasında bildirdi ki, yollarda işıqforun və piyada xətlərinin olmaması ilə bağlı sakinlərin şikayətləri var. Həmin şikayətlər əsasında icra hakimiyyəti tərəfindən Daxili İşlər və Nəqliyyat nazirliklərinə müraciət olunub.

Sektor müdirinin sölərinə görə, piyada keçidi və işıqforun qoyulması üçün müəyyən normativlər var və bu icra hakimiyyətinin səlahiyyətində deyil. Ona görə də, həmin qurumlar müraciətə baxandan sonra tədbir görüləcək.

E.Sadıqov, öz növbəsində, sakinlərdən də şikayətləndi: "Magistral yollarda, Qobustan ərazisində yerüstü piyada keçidi qoyulub, amma sakinlər təəssüf ki, istifadə etmir".

Gülər
Milli.Az