Səfir: "Azərbaycan Türkiyədən hər zaman hər mövzuda hər şey istəmək haqqına sahibdir"
29 Oktyabr 2014 10:01
Azərbaycan Türkiyədən hər zaman hər mövzuda hər şey istəmək haqqına sahibdir. Bu sözləri Türkiyənin Azərbaycandakı səfiri İsmayıl Alpər Coşqun Trend-ə müsahibəsində bildirib.
Səfir qeyd edib ki, Azərbaycan və Türkiyə bir çox məsələlərdə birgə hərəkət edirlər və bu məsələlərdən ən öndə gələni, təbii ki, Dağlıq Qarabağ münaqişəsinin həlli məsələsidir: "Bir şeyi bilmək lazımdır ki, Dağlıq Qarabağ münaqişəsinin bu şəkildə davam etdirilməsi mümkün deyil. Çünki Dağlıq Qarabağ və ərtaf rayonların işğal altında olması hər zaman potensial təhlükə mənbəyidir".
Diplomat onu da bildirib ki, Türkiyə, nə olursa-olsun, hər zaman Azərbaycana və Dağlıq Qarabağ məsələsinə Mustafa Kamal Atatürkün "Azərbaycanın kədəri bizim kədərimiz, sevinci bizim sevincimizdir" prinsipi ilə yanaşır.
Onun sözlərinə görə, Türkiyə, eyni zamanda, Dağlıq Qarabağ məsələsinə beynəlxalq hüquq çərçivəsində yanaşır və bu gün Azərbaycan torpaqlarının Ermənistan tərəfindən işğal edilməsi, ortada işğal faktının olmasını kimsə inkar edə bilməz: "Problemin həlli üçün ilk növbədə işğalın aradan qaldırılması lazımdır. Dağlıq Qarabağ probleminin həlli üçün tərəflər ortaq iradə nümayiş etdirməlidirlər və bu iradəni ilk olaraq işğalçı tərəf nümayiş etdirməlidir. Beynəlxalq ictimaiyyət də Ermənistanı bu iradəni nümayiş etdirməyə sövq etməlidir".
İ.A.Coşqun əlavə edib ki, Azərbaycan tərəfi davamlı müzakirələr aparmaqla, münaqişənin dinc yolla həlli üçün danışıqları davam etdirməklə artıq bu iradəni nümayiş etdirir.
Türkiyə Prezidenti Rəcəb Tayyib Ərdoğanın BMT sammitində Dağlıq Qarabağ məsələsini gündəmə gətirdiyini xatırladan diplomat qeyd edib ki, Türkiyə bundan sonra da bütün beynəlxalq tədbirlərdə Dağlıq Qarabağ problemini gündəmə gətirməyə davam edəcək.
Səfir bildirib ki, Türkiyə bölgənin gələcəyinin müəyyən edilməsində düşmənçilik, münaqişə və qarşılıqlı nifrətin olmaması qənaətindədir və Türkiyə ilə Azərbaycan əlində olan bütün imkanları regionun inkişafı üçün sərf etmək istəyirlər: "Azərbaycan və Türkiyənin bu təşəbbüsü İran, Rusiya və işğaldan əl çəkəcəyi təqdirdə Ermənistan üçün də faydalı ola bilər. Lakin təəssüf ki, Ermənistan rəhbərliyi bunları anlamaq əvəzinə, kor-koranə işğalı davam etdirməklə yanaşı, Azərbaycan və Türkiyəni ləkələmək siyasəti aparır. Bütün bunlarla yanaşı isə Ernənistan özünü məzlum dövlət kimi göstərməyə çalışır".
Diplomat əlavə edib ki, bu gün dünyada müzakirə olunan bir çox problemlər var və İraqdakı böhran, Suriya münaqişəsi fonunda Dağlıq Qarabağ ciddi problem kimi görünməyə bilər: "Dağlıq Qarabağ probleminə dondurulmuş münaqişə adı verilməsi doğru deyil, çünki bölgədə hər an ciddi problemlər yarana bilər".
İ.A.Coşqun deyib ki, Türkiyə Azərbaycanın ərazi bütövlüyünün qorunması, regionda sabitliyin və sülhün olması üçün əlindən gələni etməyə hazırdır: "Hesab edirəm ki, beynəlxalq ictimaiyyət bu məsələdə Türkiyədən daha çox şey tələb edə bilməz".
Milli.Az