"Leyla Yunus da belə insanlardandır"
28 Oktyabr 2014 16:53
"Azərbaycan cəmiyyətində müəyyən qrup var ki, onlar da özlərinə tərəfdar toplayaraq müəyyən işlərdə geniş istifadə edirlər. Leyla Yunus da belə insanlardandır". Bu fikirləri SİA-ya açıqlamasında Konstitusiya Araşdırmaları Fondunun rəhbəri, İnsan Haqları üzrə Birgə Qrupun üzvü Əliməmməd Nuriyev Sülh və Demokratiya İnstitunun (SDİ) direktoru Leyla Yunusun bir sıra təşkilatlar tərəfindən mükafata layiq görülməsi barədə mətbuatda gedən informasiyalara münasibət bildirərkən deyib.
Əliməmməd Nuriyev hesab edir ki, Leyla Yunus kimi satqın birinin ayrı-ayrı beynəlxalq mükafatlarda adının namizədliyə verilməsi bəzi hallarda ölkəmizə təzyiq xarakteri daşıyır: "Bəzi hallarda isə həmin şəxslərin nüfuzunun artırılmasına xidmət edir. Həmin şəxslərin ölkəsində hər hansı bir problemi varsa, guya beynəlxalq təşkilatlar bununla problemlərin həllinə dolayısı ilə dəstək vermək istəyirlər. Eyni zamanda, beynəlxalq mükafatlara namizədliyinin irəli sürülməsi onun istintaqdan azad edilməsinə xidmət edə bilər. Bu, dünya praktikasında rast gəlinən hallardandır. Hüquqi, sivil yanaşma ondan ibarətdir ki, əgər bir şəxs barəsində cinayət işi başlanıbsa, istintaq araşdırmaları gedirsə, o zaman istintaqa təzyiq formalarından istifadə edilə bilməz. Barəsində cinayət işi açılan şəxslər haqqında məlumatlar ancaq istintaq orqanının razılığı ilə ola bilər. Daha sonra isə proses məhkəmə qərarından asılı olaraq davam edir".
Onun sözlərinə görə, məhkəmə qərar qəbul etmədən heç kim Leyla Yunusun istintaqına müdaxilə edə bilməz: "Əksər hallarda bu kimi işlərin arxasında siyasi məqsədlər dayanır. Bir sıra təşkilatlar öz maraqlarını təmin etmək üçün nümayəndələrini qorumağa çalışırlar. Kimlərinsə immunitetlik haqqı var. Amma bunu hamıya şamil etmək olmaz. Bu, özbaşnalığa imkan yaradan amildir".
Əliməmməd Nuriyev İşçi Qrupundakı fəaliyyətlə də bağlı fikir bildirib: "Kimin nə danışmasından asılı olmayaraq, bu Qrup yaradılıb və fəaliyyətini düzgün quracaq: "Biz istənilən şəxslə bağlı məsələni obyektiv araşdırmağı özümüzə borc bilirik. Hüquqa və humanitar əsaslara söykənən qərarların qəbul ediləcəyi heç kimdə şübhə doğurmasın. Bəzi qurumlar və şəxslər tərəfindən son vaxtlar çox populyar fikirlərə rast gəlirik. Karvan yola çıxmamış fikir söyləyirlər. Heç bir təzyiqə, deyilən mənfi fikirlərə baxmayaraq, işimizi davam etdirəcəyik. Çünki bu, çox əhəmiyyətli və vacib işdir. Biz həm insanların dialoquna, həm də pozulmuş hüquqların bərpasına çalışacağıq. İşçi Qrupunda kifayət qədər peşəkar insanlar toplaşıb ki, bu da fəaliyyətimizi daha da gücləndirməyə təkan verəcək. Biz istənilən şəxslə dialoqa hazırıq".
Milli.Az