Sergey Qorbunov son yayımlanan videoda kömək istəmişdi
İŞİD terrorçularının amerikalı və britaniyalı girovlardan sonra bu dəfə də rus mühəndisi edam etdiyi xəbəri yayılıb.
Anspress-in məlumatına görə, İŞİD terror qruplaşmasının Suriyanın Raqqa şəhərində girov saxladığı rus mühəndis Sergey Qorbunovu güllələyərək öldürdüyü iddia edilir. Bu barədə "The New York Times"ın yazdığı xəbərdə deyilir.
Silahlıların 2013-cü ildə yayımladığı son görüntüdə Qorbunov ona qarşı yaxşı münasibət göstərildiyi, onu səudiyyəli Xalid Süleymanla dəyişmək istədiklərini bildirmişdi. Əgər bu baş verməsə, öldürüləcəyini qeyd edirdi. O buna görə Rusiya, Suriya və Beynəlxalq Qırmızı Xaç Komitəsindən kömək istəmişdi.
Xatırladaq ki, İŞİD terror qruplaşması üzvləri bu vaxtadək amerikalı jurnalist Ceyms Fouli, Stiven Sotlof və ingilis Alan Henninqin başını kəsərək edam videolarını yayıblar.