Mobil telefona görə sahibini tanımaq olar

24 Oktyabr 2014 17:27

Müasir həyatı mobil telefonsuz təsəvvür etmək çətindir

Artıq cəmiyyətdə mobil telefon yalnız danışmaq üçün vasitə kimi qəbul olunmur. Mobil telefonların rəngarəngliyi və qiymət fərqləri insanın hansı sosial statusa aid olduğunu, xarakterini, fəaliyyətini anlamağa imkan verir. Xüsusilə də, gənclər arasında daha varlı görünmək üçün borca girib bahalı və son dəbli mobil telefonlar alanlar az deyil.

Psixoloqların müşahidələrinə əsasən, mobil telefona görə sahibin xarakteri, işi, məşğuliyyəti, həyat tərzini və gəlirlərini bilmək olar. Psixoloq Jalə Həmidli hesab edir ki, qara telefon istifadəçiləri ciddi olur və diqqət çəkməyi sevmirlər. Onlar mobil telefonlarını necə fəaliyyət göstərməsinə nəzərən seçirlər. Mobil telefonları başqalarının marağına səbəb olmamalıdır.

Al qırmızı mobil telefon sahibinin diqqət mərkəzində olmağı xoşladığını göstərir. Bu cür telefon sahibi istər-istəməz başqalarında maraq oyadacaq. Qırmızı telefonlara qadınlar üstünlük versələr də, kişilər arasında da qırmızını seçənlər olur.

Ağ mobil telefon istifadəçiləri yumşaq xasiyyətlidir. Onlar evdə vaxt keçirməyi və rahatlığı xoşlayırlar. Ağ telefon daim qulluq tələb etdiyi üçün onu seçənlər səliqəli olur. Bu rəngi seçənlər diqqət mərkəzində olmağı istəmir və utancaqdır.

"Maddi baxımdan məqsədlərinə çatmış şəxslərsə qızılı telefonlara üstünlük verir. Belə adamlar pul qazana bilir və bacarıqlarını nümayiş etmək istəyirlər. Bu çalarda telefon seçimi başqalarında sahibinə qarşı hörmət hissini oyadır", - deyən müsahibimizin sözlərinə görə, şəxsi tanımaqda mobil telefonların qiyməti də böyük rol oynayır. Belə ki, ucuz telefon sahibləri özlərini qənaətcil və pulu düzgün xərcləyən hesab edir. Onlar əyləncələrə çox pul xərcləmək istəmir və öz gəlirləri barədə məlumat verməyi sevmirlər. Belə adamlar düşünmədən alış-veriş etmir. Hər qəpiyin nəyə xərcləndiyini dəqiq bilirlər. Bununla yanaşı özlərini xəsis və darıxdırıcı insan hesab etmirlər. Özlərini heç kimdən asılı hiss etmir. Reklamlara aldanmırlar. Başqaları da onlar haqda təxminən eyni fikirdə olur. Lakin ucuz telefon istifadəçiləri kənardan qənaətcil deyil, xəsis insan kimi görünür. Bəziləri isə belə adamların tənbəl olduqlarını və yeni model telefonların funksiyalarını öyrənməyə ərindiklərini düşünür. Dəb sevərlər isə belə adamları ya zövqsüz ya da imkansız olduqları qənaətinə gəlirlər. Amma əksəriyyət ucuz telefon sahiblərinin seçimini müsbət qiymətləndirir və bahalı telefonla özlərini göstərmədikləri üçün hörmətlə yanaşırlar.

Bahalı və son dəbdə olan telefonları seçənlər ətrafdakıların zövqünə heyran oldqularını düşünür. Onlar çox bahalı telefon işlətməklə, hər şey bildiklərini, gözəlliyə qiymət verdiklərini və incəsənəti anladıqlarını göstərmək istəyir. Belə adamlar o qədər də lazım olmayan vasitəyə görə çox pul xərclədiyi üçün başqalarının onlara paxıllıq etditiyini düşünürlər. Bahalı telefon işlədikləri üçün hər kəsin hörmətini və paxıllığını umurlar.

Lakin ətrafdakılarda belə şəxs bədxərc təəssüratını yaradır. Belə insanın əslində zövqsüz olduğunu, geyim və aksessuarlar vasitəsilə özünə diqqət çəkmək əvəzinə mobil telefonu ilə "gözə girmək" istədiklərini düşünürlər. Ciddi, işgüzar insanlar çox vaxt belə insanlarla iş görməyə meyl etmir. Ona görə ki, çox dəbli və bahalı telefon sahibləri etibarlı isan təəssüratını yarada bilmirlər. Bu səbəbdən də, dəbli telefonlar işgüzar insanların işinə yaramır və onları qeyri ciddi göstərir.

Bəzi gənc xanımlarasa bahalı telefon sahibləri daha cazibədar görünür. Onlar belə adamların diqqətə layiq olduğunu düşünür. Bu səbəbdən də, gənc xanımların rəğbətini qazanmaq üçün də bahalı telefon işlədənlər olur.

Texniki cəhətdən yeniliklərlə zəngin telefon istifadəçiləri də, telefon sayəsində ətrafdakıların onlara hörmətlə yanaşdıqlarını düşünür. Öz telefonlarına görə, hətta qürur duyur, özlərini müasir hiss edirlər. Psixoloqun fikrincə, ətrafdakılar belə insanların texniki yeniliklərə çox alüdə olduqlarını düşünürlər. Onları qapalı, ünsiyyətdən qaçan, bütün günü telefonu ilə qurdalanan adam kimi qəbul edirlər: "Bu səbəbdən də, gününü "samrtfon"larla keçirənlər bu xüsusiyyəti ilə ətrafdakıları qorxutduqlarını anlamalıdır. Çox vaxt belə insanlar nə kişilər, nə də qadınlarda empatiya yaratmırlar".

Ekspress.az