Bakı metrosu necə qorunur? - FOTO

14 Oktyabr 2014 15:55

İctimai nəqliyyatın bu növünün istifadəçiləri arasında metronun yaxşı mühafizə edildiyini deyən də var, bunun əksini düşünən də

Təyyarə ilə Bakıya gələn hər kəs Heydər Əliyev adına Hava Limanında bir neçə mərhələli yoxlama prosesindən keçirilir. Gömrükçülər Azərbaycan vətəndaşları və əcnəbilər arasında fərq qoymadan ölkəyə girən hər kəsi təpədən-dırnağa, kəmərlərinin, ayaqqabılarının içərisinə qədər yoxlayırlar. Bir çoxları bu dərəcədə dərindən yoxlamanın yersiz olduğunu düşünsə də, bunun əksini düşünənlər də var.

Maraqlıdır, insanların daha çox istifadə etdiyi metro stansiyaları necə qorunur?

Bakı Metropoliteninin rəsmiləri metroda təhlükəsizliyin ciddi qorunduğunu deyirlər. Xatırladaq ki, bir neçə il öncə Neft Akademiyasında 12 nəfərin ölümü, 13 nəfərin yaralanması ilə nəticələnən terror hadisəsini törədən Gürcüstan vətəndaşı Fərda Qədirov qətli törətməzdən əvvəl iki dəfə metrodan istifadə etmişdi.

Hazırda metronun necə qorunduğunu, metroda nə dərəcədə güvəndə olduğumuzu öyrənmək üçün bir neçə stansiyaya baş çəkib müşahidə apardıq. İlk baş çəkdiyimiz məkan metronun "Neftçilər" stansiyası oldu. Polis əllərində böyük çantası olan hər kəsi detektorla yoxlayırdı. Buradakı polislər olduqca diqqətli görünürdü. Daha sonra metronun "Nərimanov" stansiyasına baş çəkdik. Burada başı söhbətə qarışan polislərin qarşısından əlimizdə böyük çanta ilə rahatca keçdik. Bizi saxlayıb çantanın içərisində nə olduğunu soruşan belə olmadı. Qayıdıb polisə niyə çantamızı yoxlamadığını soruşduqda o, "siz şübhəli birinə bənzəmirsiniz" cavabını verdi. Daha sonra jurnalist olduğumuzu bildirib bir az söhbət etməyə çalışdıq. Adlarını demək istəməsələr də, polislər işlərinə həssaslıqla yanaşdıqlarını bildirdilər: "Biz əlində böyük çantası olan, şübhəli bildiyimiz hər kəsi detektorla yoxlayırıq. Hətta lazım gəldiyində o adama çantasını belə açdırıb içinə baxırıq. Düzdür, buna etiraz edib bizimlə dalaşanlar da olur. Amma insanlar başa düşməlidirlər ki, biz bunu onların təhlükəsizliyi üçün edirik".

Digər baş çəkdiyimiz metro stansiyası isə "28 May" oldu. Bu stansiyanın təzə açılan girişindən az adam istifadə etdiyindən orada elə də sıxlıq yox idi və bir nəfər polis işçisi vardı.

Daha sonra daha çox istifadə edilən Cəfər Cabbarlı keçidinə üz tutduq. Burada olduqca çox sərnişin vardı. Polislər metroya daxil olan şəxsləri diqqətlə yoxlayırdılar. Hətta bir yaşlı qadınla polis işçisinin mübahisəsinə də qulaq müsafiri olduq. Polis qadından əlindəki torbaları açmasını tələb edirdi. Qadın isə bundan imtina edərək əlindəki torbaların içində onun şəxsi əşyalarının olduğunu deyirdi. Bir müddət davam edən mübahisədən sonra qadın çantasını açdı, bundan sonra o, qatara minmək üçün buraxıldı.

Polisdən bu tip sərnişinlərlə rastlaşanda nə etdiyini soruşduq. O, çantasını açmadığı təqdirdə həmin sərnişinin metrodan kənarlaşdırıldığını bildirdi: "Biz əvvəlcə detektorla yoxlayırıq. Detektor siqnal verdiyi halda sərnişindən əlində olan bağlamanı və ya çantanı açmağı xahiş edirik. Rədd etdikdə həmin şəxsə bunu təhlükəsizlik üçün etdiyimizi başa salmağa çalışırıq. Yox, əgər yenə də anlamasa və mübahisə etməyə davam etsə, metronu tərk etməsini tələb edirik. Biz hava limanındakı kimi dərindən yoxlama apara bilmərik. Bu mümkün də deyil. Metroya o qədər adam girir ki, onları bir-bir dərindən yoxlamaq həm vaxt itkisi olar, həm də metro istifadəçilərinin özləri də buna razı olmazlar".
Hər gün metronun xidmətindən istifadə edən sərnişinlərin də mövzu ilə bağlı fikrini öyrəndik. Metro istifadəçiləri metronun yaxşı qorunduğunu desələr də, müəyyən boşluqların olduğunu bildirdilər. Hər gün metro ilə işə gedib-gəldiyini dəyən Səma Quliyeva polislərin işini lazımınca yerinə yetirmədiyini düşünür: "Polislər hərdən metroya ciddi nəzarət etsələr də, bəzən kimin əlində nə tutaraq metroya daxil olduğuna belə fikir vermirlər. Başları ya bir-biri ilə söhbət etməyə, ya da ki, telefonla oynamağa qarışır".

Təqaüdçü olduğunu deyən Abbas Məmmədov isə metronun lazımınca qorumadığını düşünür: "Metro yaxşı qorunmur. Mən özüm dəfələrlə əlimdə yüklə rahatca daxil olmuşam. Belə vəziyyətdə kim nə istəsə, keçirə bilər".

Digər sərnişin Sərxan Allahverdiyev isə metroya nəzarətin güclü olduğunu dedi: "Mən özümü metroda güvəndə hesab edirəm. Polislər şübhələndikləri şəxsləri və ya əllərində böyük bağlaması, çantası olanları saxlayıb yoxlayırlar".

Xatırladaq ki, bu vaxta qədər Bakı metrosunda iki qanlı terror aktı törədilib. Bunlardan biri 1994-cü il martın 19-da "20 Yanvar" stansiyasında baş verən partlayışdır. Bu partlayışda 14 nəfər həlak olub, 49 nəfər isə yaralanmışdı. Digər terror aktı isə elə həmin il iyulun 3-də "Gənclik" stansiyasında baş vermiş və hadisə zamanı 13 nəfər həlak olmuşdu.

"Yeni Müsavat"

Böyütmək üçün şəkillərə klikləyin.