"Akkord" Korporasiyası istehsal potensialını gücləndirməkdə davam edir
9 Oktyabr 2014 13:49
02 oktyabr 2014-cü il tarixdə "Akkord Sənaye Tikinti İnvestisiya Korporasiyası" Açıq Səhmdar Cəmiyyətinin müvafiq istehsalat sahələrinin bazasında "Akkord Beton" Məhdud Məsuliyyətli Cəmiyyəti, "Akkord Prefabrik" Məhdud Məsuliyyətli Cəmiyyəti və "Akkord Mərmər Qranit" Məhdud Məsuliyyətli Cəmiyyəti yaradılmışdır. Artıq uzun illərdir ki, "Akkord" Korporasiyası digər fəaliyyət növləri ilə yanaşı beton, mərmər, qranit, yığma dəmir-beton konstruksiyaların istehsalı üzrə ixtisaslaşır və bazarda layiqli yer tutur. Bu üç yeni şirkətin yaradılması müvafiq sahələr üzrə rəqabətədavamlı məhsulların istehsalı, yeni bazarlara çıxış imkanlarının artırılması, müasir istehsalatın qurulmasına xidmət edəcəkdir.
Xatırladaq ki, Azərbaycanın qərb regionunun ən iri müəssisələrindən olan, "Akkord" Korporasiyası tərəfindən Qazax rayonu ərazisində inşa edilmiş Qazax Sement Zavodu da 2013-cü ilin sonundan etibarən "Qazax Sement Zavodu" Məhdud Məsuliyyətli Cəmiyyəti kimi fəaliyyət göstərir.
"Akkord Beton" MMC, "Akkord Prefabrik" MMC və "Akkord Mərmər Qranit" MMC kimi üç yeni şirkətin yaradılması "Akkord" Korporasiyasının inkişaf strategiyasında müəyyən edilmiş hədəflərə nail olmaq, geniş çeşidli fəaliyyətini müxtəlif sahələr üzrə diversifikasiya etmək, "Akkord" Korporasiyasının bazasında müasir dövrün tələblərinə və çağırışlarına cavab verən holdinq şirkətinin qurulması məqsədilə həyata keçirilir.
Əlamətdar haldır ki, Azərbaycan Respublikası Prezidentinin 10 yanvar 2014-cü il tarixli sərəncamı ilə 2014-cü il Azərbaycan Respublikasında "Sənaye ili" elan edilmişdir. Dövlət başçısının bu sərəncamında nəzərdə tutulan tədbirlərin həyata keçirilməsi və xüsusilə "Azərbaycan Respublikasında sənayenin inkişafına dair 2015-2020-ci illər üçün Dövlət Proqramı"nın hazırlanması Azərbaycan iqtisadiyyatının qeyri-neft sektorunun inkişafının gücləndirilməsinə, regionların sənaye potensialının artmasına və innovativ texnologiyalar əsasında sənayenin qurulmasına əlavə təkan verəcəkdir.