Əşrəf Qəni 3,5 aydır davam edən siyasi böhrandan sonra səlahiyyətlərinin icrasına başlayacaq
Əfqanıstanın yeni seçilmiş prezidenti Əşrəf Qəni bu gün and içəcək.
Milli.Az-ın anspress-ə istinadən məlumatına görə, təntənəli inauqurasiya mərasimi paytaxt Kabildə keçiriləcək. Bu məqsədlə şəhərdə təhlükəsizlik tədbirləri yüksək həddə çatdırılıb. Andiçmə mərasiminə xeyli sayda ölkənin dövlət və hökumət başçıları dəvət ediliblər.
Əfqanıstanda prezident seçkilərinin ikinci turu iyunun 14-də baş tutmuşdu. Seçkilərdə namizədlər Abdulla Abdulla və Əşrəf Qəni bir-birini fırıldaqçılıqda ittiham edərək, səsvermənin nəticələrini tanımaqdan imtina etmişdilər.
3 aydan çox davam edən siyasi böhrandan sonra Abdulla Abdulla və Əşrəf Qəni milli birlik hökumətinin yaradılmasına və hakimiyyətin bölüşdürülməsinə dair razılığa gəlmişdilər.