Bakıdakı "Duzlu göl" xəstəlik mənbəyidir? - FOTO

10 İyul 2014 11:17

Əməkdaşımız insanların şəfa tapmaq üçün getdiyi "Duzlu göl"də gördüklərindən yazır; Həkim: "Gölə gedib dərd tapanlar var"

Hövsan-Zığ magistral yolunun kənarında yerləşən "Duzlu göl" xəstəlik mənbəyinə çevrilib. Bunu redaksiyamıza müraciət edən daimi oxucularımız deyirlər. Onların sözlərinə görə, şəfa tapmaq məqsədilə getdikləri "Duzlu göl"dən yeni xəstəliklər tapıblar. Oxucularımız iddia edirlər ki, antisanitariya şəraitinin hökm sürdüyü göldə çimib, palçıq vannası qəbul etdikdən sonra dəri xəstəliyinə düçar olublar. Mövzu ilə bağlı ötən gün Hövsan-Zığ magistral yoluna yaxın yerləşən gölə gedib, oradakı vəziyyəti öyrənməyə çalışdıq.

5 manata palçıq vannası

Şəhərdən üzü Hövsana gedəndə yolun sağında olan gölə gedən yol bərbad gündədir. Gölə giriş üçün 50 qəpik ödəməlisən. Gölün ərazisi zibil içindədir. Boş su qabları və sellofan torbalar göydə uçuşur. Paltar dəyişmək üçün kiçik bir köşkün qarşısında saatlarla gözləməli olursan. Birinci dəfə gələnlərə suda çox qalmamaq məsləhət görülür. Daha sonra palçıq vannası qəbul etmək istəyənlər üçün sifariş qəbul olunur. Təxminən 18-20 yaşlarındakı gənc gölə gələnlərə yaxınlaşıb sifarişləri qəbul edir. Təzə palçıq istəyənlər bu xidmətə görə 5 manat ödəməlidir. Qiymətin niyə belə baha olduğunu soruşuruq. Ramin adlı işçi deyir ki, gölün ortasına gedib, əlləri ilə palçıq yığırlar: "Palçığı əvvəlcədən yığıb saxlamaq olmur. Gün qurudur. Ona görə kim palçıq vannası qəbul etmək istəyirsə, yaxınlaşıb sifarişini qeyd edirik. Təxminən yarım saata onun üçün palçıq vannası düzəldirik. Olduqca zəhmətli işdir".

Bəs palçıq vannasının nə kimi xeyri var? Sualımıza Ramin bu şəkildə cavab verir: "Çoxları bura həkim məsləhəti ilə gəlir. Tez-tez həkimlər gəlib palçıqdan nümunə götürüb laboratoriyada yoxlayırlar. Əgər ziyanlı bir şey olsaydı, həkimlər xəstələrinə palçıq vannasını məsləhət görməzdilər. Bu palçığa yod qatılır. "Duzlu göl"dən çıxarılan palçıqda mikrob ola bilməz. Palçığı yodla yoğurduqdan sonra vannalara tökürük. Bəziləri vannaya girib, saatlarla gözləyir, bəziləri isə palçığı bədənlərinə sürtüb günəşlənirlər".

"Natəmizlik içində nə xeyir tapacağıq?"

Göldə çimən paytaxt sakini Adil Məmmədov deyir ki, hər gün olmasa da, vaxtaşırı bu gölə gəlir: "Dəri xəstəliyim var. Həkim dedi, get "Duzlu göl"də çim. Bir aydır bura gəlirəm, xeyli irəliləyiş var. Yaxşı olardı ki, buranı kimsə götürüb sanatoriyaya çevirsin. Zibil əlindən tərpənmək olmur. Göldə çimdiyimiz yerdə bir də görürsən boş su butulkası az qalsın ağzına girə. Əllərinə nə keçdi, gölə atırlar. Gölün kənarında zibil atmaq üçün qutular qoysaydılar, yaxşı olardı. Buranın cəmi 2-3 işçisi var. Onların da biri qapıda pul yığır, digərləri isə palçıq satırlar. Burada səliqə-sahman və təmizlik olsa, gələnlərin sayı çox olardı. Belə yerləri qoruyub-saxlamaq lazımdır. Yoxsa natəmizlik içində nə şəfa tapacağıq?"

Ərazidə olarkən öyrəndik ki, göldən 100-150 kilometr aralıda yodla zəngin bulaq var. Yodlu su yerdən qaynayaraq çıxsa da, su çox soyuqdur. Orada olarkən öyrəndik ki, bu su boğazdakı ağrılara, faringit, zob və astma xəstəliklərinə xeyirdir. Bulağın suyu axaraq çökəkliklərə dolur. "Duzlu göl"ə gələnlərin çoxu bura da baş çəkərək əl-üzlərini yuyub, bulağın suyundan içirlər. Təəssüflər olsun ki, burada da natəmizlik hökm sürür.

Həkim nə deyir?

Mövzu ilə bağlı danışdığımız 1 saylı şəhər Kliniki Xəstəxananın tanınmış dermatoloqu, həkim Adil Qəmbərov bildirdi ki, yaxşı olardı ki, o gölün suyu və palçıq yüksək avadanlıqla təchiz olunmuş laboratoriyalarda yoxlanılsın: "Həmin gölə gedib dərd tapanlar var. Neçəsi mənə müraciət edib. Ötən gün özüm həmin gölə gedib sudan və palçıqdan nümunə götürdüm. Paslı vannalardakı palçığa girmək üçün növbəyə dururlar. Bilmirlər, bəlkə birinin ağır dəri xəstəliyi var. O xəstəlik keçici də ola bilər. İnsanlar bu barədə qətiyyən düşünmürlər. Kor-koranə palçıq vannası qəbul edib, göldə çimirlər. Belə yerlərə getməmişdən mütləq həkimlə məsləhətləşmələr aparmaq lazımdır. Mən gördüm, insanlar bədənlərinə tərkibini bilmədikləri palçığı yaxıb saatlarla günəşin altında qalırlar. Qətiyyən belə olmaz".

Adil həkimin sözlərinə görə, suyun və palçığın tərkibi öyrənilmədən heç kəs onun xeyri barədə danışa bilməz.

"Yeni Müsavat"

Böyütmək üçün şəkillərə klikləyin.