Cəzaçəkmə Müəssisəsində araşdırma aparıldı

31 Yanvar 2014 16:41

Ombudsman Aparatının əməkdaşları penitensiar müəssisələrdə araşdırmalar aparıb

Ombudsman Aparatının mətbuat xidmətindən Trend-ə verilən məlumata görə, Azərbaycan Respublikasının İnsan Hüquqları üzrə Müvəkkili Elmira Süleymanovanın tapşırığına əsasən, Ombudsman Aparatının əməkdaşları Ədliyyə Nazirliyi Penitensiar Xidmətinin Müalicə Müəssisəsinə və 10 saylı Cəzaçəkmə Müəssisəsinə başçəkmələr həyata keçiriblər.

Başçəkmə zamanı Ombudsmanın nümayəndələri Müalicə Müəssisəsinin cərimə təcridxanasında saxlanılan şəxslərin saxlanılma şəraiti, səhhəti və onlara qarşı rəftarla bağlı mövcud vəziyyəti öyrəniblər.

Saxlanıldıqları cərimə palatalarında təklikdə qəbul edilmiş şəxslərlə konfidensial qaydada aparılan söhbət zamanı həmin şəxslər saxlanılma şəraiti, rəftar və onlara göstərilən tibbi yardımın keyfiyyəti ilə bağlı şikayət etməyiblər.

Həmçinin Müvəkkilin ünvanına daxil olmuş müraciətin yerində araşdırılması məqsədilə Ombudsman Aparatının əməkdaşları həmin gün 10 saylı Cəzaçəkmə Müəssisəsində də olublar.

Valideynlərinin müraciəti ilə əlaqədar məhkum O.M. Müvəkkilin nümayəndələri tərəfindən təklikdə qəbul edilib. Söhbət zamanı həmin şəxs müəssisədəki saxlanılma şəraiti və rəftarla bağlı heç bir şikayətinin olmadığını bildirib, bu barədə özünün Ombudsmana ünvanladığı təşəkkür ərizəsində də qeyd edib.

Milli.Az