"Volkswagen" ABŞ bazarına 7 milyard investisiya qoyacaq

14 Yanvar 2014 16:32

Avropanın ən geniş avtokonserni olan şirkət 2018-ci ildə dünyanın ən böyük avtomobil istehsalçısı olmağı qarşısına məqsəd qoyub

Almaniyanın avtomobil nəhəngi "Volkswagen" istehsal gücünü artırmaq məqsədilə Amerika Birləşmiş Ştatları bazarına 7 milyard dollar məbləğində maliyyə yatırımı edəcək. Şirkətin bu məbləği 5 il müddətində yatırıma buraxacağı planlaşdırılır.

Anspress yazır ki, Avropanın ən geniş avtokonserni olan şirkət 2018-ci ildə dünyanın ən böyük avtomobil istehsalçı olmağı qarşısına məqsəd qoyub. Şirkətin rəhbəri Martin Vinterkorn bu barədə məlumat verib. Rəhbərliyin sözlərinə görə, şirkət yaxın iki il ərzində yeni modellerini də təqdim edəcək. Yeni modellər idman tərzində olacaq.

Volkswagen hazırda Yaponiyanın "Toyota" və Amerika Birləşmiş Ştatlarının "Ceneral Motors" şirkətlərindən sonra dünya bazarında 3-cü yerdədir.

Şirkət 2018-ci ilə qədər bir milyona yaxın "Volkswagen" və "Audi" modelləri satmağı qarşısına məqsəd qoyduğunu qeyd edib. Ötən il "Volkswagen" avtomobil bazarında ən çox qazanan şirkətlərdən biri olub.

Milli.Az