İllərdir lüksün simvolu olan mərmər mətbəx dəzgahları cızılma, ləkə və qulluq problemlərinə qarşı daha davamlı olan farfor, sinterlənmiş daş və kvars kimi yeni nəsil alternativlərlə əvəz olunur.
Milli.Az xəbər verir ki, təbii damarlı və şık görünüşə malik mərmər məsaməli quruluşu səbəbindən limon, qəhvə və yağ kimi maddələri tez əmərək qalıcı ləkələr yaradır, həmçinin mütəmadi qulluq və qoruyucu cilalanma tələb edir. Turşulu qidalarla təmasda matlaşması və isti qazanlara qarşı həssas olması alternativlərə marağı artırıb.
Yeni nəsil əsas alternativlər:
Farfor və sinterlənmiş daş: Yüksək istilik və təzyiqlə istehsal olunan bu səthlər aşağı məsaməliliyi sayəsində maye əmməyə qarşı yüksək müqavimət göstərir. Cızılma, ləkə və istiyə davamlılığı ilə yanaşı, mərmər görünüşünü də təqlid edə bilir.
Kvars dəzgahlar: Təbii kvars kristallarının qətranla birləşdirilməsi ilə hazırlanan bu kompozit səthlər ləkə yaratmır, geniş rəng seçimi təqdim edir və xüsusilə sıx istifadə edilən ailə mətbəxlərində asan təmizliyi ilə seçilir.
Paslanmaz polad və mikro sement: Professional mətbəxlərdən evlərə daşınan paslanmaz polad gigiyenik və davamlıdır; mikro sement isə minimalist dizaynları üstün tutanlar üçün nəzərdə tutulub.
Mütəxəssislər dəzgah seçərkən təkcə estetikaya deyil, istifadə sıxlığına və qulluq ehtiyacına diqqət yetirməyi tövsiyə edirlər. İntensiv istifadə olunan mətbəxlər üçün farfor və sinterlənmiş daş, rahatlıq və rəng çeşidi axtaranlar üçün isə kvars kompozitlər ideal seçim hesab olunur.
Müəllif: Ülkər Vəliyeva (Milli.Az redaktor)