Payız-qış mövsümündə yağışlı və soyuq hava şəraiti insanların gündəlik qidalanma vərdişlərinə də təsir edir. Belə günlərdə isti, doyumlu və qidalı yeməklərə maraq artır. Xüsusilə şorbalar, ətli yeməklər və isti içkilər yağışlı havada ən çox seçilən qidalar sırasındadır.
Milli.Az xəbər verir ki, yağışlı havalarda orqanizmin enerji və qida ehtiyacını qarşılamaq üçün balanslı qidalanmaq vacibdir. Bu baxımdan toyuq şorbası, mərci şorbası, tərəvəz supu və ət bulyonu yaxşı seçim hesab olunur. Sözügedən yeməklər həm maye qəbulunu artırır, həm də orqanizmi zəruri qida maddələri ilə təmin edir.
Mütəxəssislər belə havalarda balqabaq, kök, kartof və digər tərəvəzlərdən hazırlanan isti yeməklərə də üstünlük verilməsini məsləhət görürlər. Tərkibində lif, vitamin və minerallar olan bu məhsullar sağlam qidalanmanın mühüm hissəsidir.
Yağışlı günlərdə süfrədən əskik edilməməli qidalardan biri də sıyıqlardır. Xüsusilə yulaf və qarabaşaq sıyığı uzun müddət toxluq hissi yaradır və enerji ehtiyacının qarşılanmasına kömək edir. Ət, balıq və paxlalı bitkilər isə zülal mənbəyi kimi gündəlik menyuda yer almalıdır.
Belə havalarda isti içkilərə də tələbat artır. Limonlu çay, zəncəfil dəmləməsi, nanə çayı və digər bitki çayları sərin havada xoş istilik hissi yaradır. Bal əlavə edilmiş ilıq içkilər də seçimlər arasında ola bilər.
Digər tərəfdən, yağışlı havalarda həddindən artıq yağlı, qızardılmış və ağır yeməklərin qəbulunu məhdudlaşdırmaq tövsiyə edilir. Fast-food və şəkərli içkilər əvəzinə ev şəraitində hazırlanmış təbii və qidalı yeməklərə üstünlük vermək daha məqsədəuyğundur.
Qeyd edək ki, yağışlı havada xüsusi qidalanma rejiminə ehtiyac olmasa da, mövsümə uyğun məhsullardan istifadə etmək, kifayət qədər maye qəbul etmək və balanslı menyu seçmək sağlamlığın qorunmasında mühüm rol oynayır.
Müəllif: Aysel Əkbər (Milli.Az müxbir)