.jpg)
Azərbaycanlı gənc aktyor Eldar İsgəndərov Hollivudda çəkildiyi filmlə diqqət çəkib. Onun ifası və Azərbaycan haqqında söhbətləri nəticəsində "Club Kid" filminin ssenarisində dəyişiklik edilib, obrazın azərbaycanlı olması qərara alınıb.
25 yaşlı aktyor xarici mediaya müsahibəsində Hollivuda gedən yolundan, çəkildiyi filmlərdən, ABŞ-da yaşadığı çətinliklərdən və gələcək planlarından danışıb.
Milli.Az həmin müsahibəni təqdim edir:
"İncəsənət məktəblərində həmişə öz istedadı ilə seçilən insanlar olur. Elə tələbələr var ki, onların ifasını izləyən kimi gələcəkdə böyük uğurlar qazanacaqlarını hiss edirsən. Üç il əvvəl kollecdə kiçik bir teatr zalında dostlarımın geyimlərini hazırladığı bir neçə qısametrajlı tamaşaya baxırdım. Həmin tamaşalardan birində yaşıdları arasında həm yumoristik, həm də qeyri-adi performansı ilə diqqətimi çəkən bir aktyor var idi. O, aktyorluq ixtisası üzrə təhsil alan, indi isə "A24" şirkətinin "Oskar" mükafatına namizəd göstərilməsi gözlənilən iki filmində rol alan 25 yaşlı Eldar İsgəndərov idi.
Sənət məktəbində birlikdə oxuduğumuz dövrdə onun istedadını artıq görmüşdük. İndi isə kino sənayesi də bunu kəşf edib. Azərbaycandan olan bu gəncin dünyaya göstərəcək xüsusi istedadı var.
2024-cü ildə birlikdə təhsil aldığımız Savannah İncəsənət və Dizayn Kollecini (SCAD) bitirməsindən iki il sonra Eldar ilk peşəkar rolları ilə film festivallarında iştirak edir. O, Jordan Firstmanın "Club Kid" və Jesse Eisenbergin "The Debut" filmlərində rol alıb.
Eisenbergin filmində tamaşaçılar Eldarı Piotr obrazında görürlər. O, Paul Giamattinin canlandırdığı, Nyu-Cersi ştatında həvəskar teatr tamaşasına rəhbərlik edən, olduqca tələbkar rejissor Cerrinin köməkçisidir. Piotr daim həyəcanlı olan, qəhvə gətirmək kimi tapşırıqları yerinə yetirən bir obrazdır.
Lakin Eldar "Club Kid" filmində daha çox diqqət çəkir. O, Jordan Firstmanın canlandırdığı Peter obrazının evində yaşayan, Azərbaycandan olan və fəlsəfə ilə maraqlanan, homoseksual kimliyini gizlətməyən Nicky obrazını canlandırır. Onun ciddi görkəmlə yumoristik cümlələr səsləndirməsi və obrazına tamamilə köklənməsi filmin ən yaddaqalan məqamlarından birinə çevrilir.
Festival səyahətinə başlamazdan əvvəl Eldar artıq "A24" şirkətinin daha bir layihəsində - Molly Gordonun "Peaked" filmində də çəkilmişdi.
Müsahibə üçün Nyu-Yorkda Mərkəzi Parkın yaxınlığında görüşəndə hər ikimizin tələbəlik həyatından sonrakı yollarının maraqlı şəkildə kəsişdiyini hiss edirik. İki gün əvvəl Eldar hər iki filmin nümayiş olunduğu SCAD-ın illik film festivalında iştirak etmək üçün Savannaya qayıtmışdı. O, vaxtilə Demi Moore və Pamela Anderson kimi məşhurlardan müsahibə almağa çalışan tələbə jurnalist olduğum şəhərdə bu dəfə özü ulduzlarla dolu qırmızı xalçadan keçmişdi.
Nyu-Yorkun payız mənzərəsi fonunda - hazırda hər ikimizin yaşadığı şəhərdə - Eldarla Amerika cənubundakı mədəni fərqlər, arzularına çatmaq hissi və filmlərdə seliyin təmsil olunması barədə söhbət edirik.
FLORA MEDİNA: İlk növbədə, təbrik edirəm. Düşünürəm ki, həyatının çox həyəcanlı bir dövrünü yaşayırsan.
ELDAR İSGƏNDƏROV: Təşəkkür edirəm. Elə hiss edirəm ki, artıq zirvəyə çatmışam və indi bir az sakitləşməyə hazıram. Özümü toparlamaq istəyirəm. Çəkilişdə olmasan belə, bu sahədə olmaq, insanlarla birlikdə işləmək çox xoşdur. Mən bunu tez-tez yay düşərgəsinə bənzədirəm. Əlbəttə, qəribə məqamları çıxmaq şərtilə.
.jpg)
Hər iki filmdəki rolları necə əldə etdiyindən danışaq.
Hər şey SCAD-dan başladı. Orada məzun aktyorların təqdimatında iştirak etdim və daha sonra menecerlərlə müqavilə bağladım. Təxminən altı ay dinləmələrə qatıldım, müxtəlif təcrübələr qazandım, kastinq direktorları ilə görüşdüm. Daha sonra Azərbaycana qayıtdım.
Bir müddət orada dincəldim və ABŞ-a qayıdıb-qayıtmayacağıma qərar verə bilmirdim. Çünki həmin vaxt baş verən hadisələr və müvəqqəti tələbə vizası ilə bağlı məsələlər məni narahat edirdi.
Amma sonra menecerim "The Debut" filmi üçün dinləmə təklifini göndərdi. Mən artıq "A Real Pain" filminə baxmışdım və çox bəyənmişdim. Buna görə də dinləmələrə qatıldım. Mənə bildirdilər ki, rolu mənə təklif edə bilərlər, amma əvvəlcə viza məsələsini həll etməliyik.
Nəhayət, bunu bacardıq və otaq yoldaşımla birlikdə Nyu-Yorka köçdük. Ancaq sonrakı üç ay ərzində heç bir müqavilə imzalamadım. Artıq narahat olmağa başlamışdım ki, bəlkə də məni seçmək fikirlərindən daşınıblar. Bu halda Nyu-Yorkda qalmaq mənim üçün çətin olacaqdı. Bu, həqiqətən də qorxulu idi. Amma sonda rolu aldım və çəkilişlərə başladıq.
Daha sonra "Club Kid" filmi üçün dinləmələrə qatıldım. "The Debut" filminin prodüserlərindən biri olan Ryan Heller kastinq direktoru Carmen Cuba ilə əlaqə saxlayaraq ona belə dedi: "Bir oğlan var, maraqlı aksentlə danışa bilir".
Carmen ona bildirdi ki, mən artıq onların diqqətində olan aktyorların siyahısındayam. Buna baxmayaraq, aksentlə yenidən dinləməyə qatıldım. Düşünürəm ki, Jordan məhz bundan sonra məni fərq etdi.
Bu sahədə hər şey bir nəfərlə işləməkdən və həmin şəxsin səni başqasına tövsiyə etməsindən başlayır.
Tamamilə razıyam.
Bundan sonra Molly Gordonun "Peaked" filmində rol aldım. Əvvəlcə bir dəfə dinləməyə qatıldım, sonra isə şəxsən görüşə dəvət edildim.
Maraqlı bir hadisə oldu. Mən həmin vaxt kimləsə keçirdiyim gecədən sonra yataqdan yenicə qalxmışdım ki, zəng gəldi. Məndən çəkilişə gəlməyimi istədilər. Özümü dünyanın ən xoşbəxt insanı kimi hiss edirdim və sadəcə "Gələrəm" dedim.
Mətni əzbərləməmişdim, üstəlik, uzun müddət idi dinləmələrdə iştirak etmirdim. Onlara etiraf etməli oldum ki, indicə başqa birinin yatağından qalxıb gəlmişəm. İçəri girəndə də zarafatla dedim: "Bağışlayın, mənim üçün əyləncəli bir gecə oldu".
Onlar çox mehriban davrandılar. Molly Gordon improvizasiyaya üstünlük verən rejissordur. Buna görə də proses çox maraqlı keçdi.
"Club Kid" filmindəki obrazın nə qədəri ssenaridə var idi, nə qədəri isə səninlə Jordanın əməkdaşlığı nəticəsində ortaya çıxdı?
Obrazın böyük hissəsi mənimlə Jordanın birgə işi nəticəsində formalaşdı. Əvvəlcə personajın azərbaycanlı olması nəzərdə tutulmamışdı. Sadəcə onun evində yaşayan bir oğlan kimi yazılmışdı.
Çəkiliş meydançasında da çoxlu improvizasiya etdik. Xüsusilə Colleen Campın canlandırdığı, Peterin aşağı mərtəbədə yaşayan qəribə qonşusu ilə bağlı səhnələrin əksəriyyəti improvizasiya idi.
Amma bütün bunlar əsasən Jordanla aramızda gedən söhbətlər nəticəsində formalaşırdı.
Filmdə mənim selik hazırladığım bir səhnə var. Bu, ssenaridə də mövcud idi, amma sonradan gördüyünüz qədər geniş şəkildə nəzərdə tutulmamışdı. Bizə filmdə seliyin də özünəməxsus təmsilçiliyi lazım idi.
Deməli, SCAD-da təhsil almaq üçün ABŞ-a gəlmisən?
Mən ABŞ-a Belçikadan gəlmişəm. Universitet axtardığım vaxt SCAD nümayəndələri Belçikada oxuduğum məktəbə gəlmişdilər.
Həmin vaxt artıq kino və televiziya sahəsində təhsil almaq istədiyimə qərar vermişdim. Amma valideynlərimə gələcəkdə bu sahənin biznes tərəfi ilə məşğul olacağımı deyirdim. Aktyorluqla isə əlavə olaraq məşğul olmağı düşünürdüm.
Valideynlərim mənim Niderlanda köçməyimi istəyirdilər. Amma holland dilini yaxşı bilmirdim. Öz-özümə düşünürdüm ki, orada teatrla məşğul olsam, tamaşaların əksəriyyəti holland dilində olacaq. Üstəlik, Niderlandda kino və televiziya sahəsinin necə inkişaf etdiyini də bilmirdim.
SCAD nümayəndələri məktəbimizə gələndə məsləhətçim mənə bu universitet haqqında məlumat verdi. Əvvəlcə universitetin adını səhv eşitmişdim. Elə bildim "Scat" və ya "Scab" deyirlər. Düşündüm ki, universitet üçün çox qəribə addır.
Sonra onlarla görüşdüm və təhsilin biznes tərəfini mənə çox yaxşı təqdim etdilər. Daha sonra COVID-19 pandemiyası başladı. Narahat oldum, qərar verməyi təxirə saldım və Belçikada daha bir il qalmağa qərar verdim. Bundan sonra ABŞ-a getdim.
Beləliklə, ABŞ-da ilk təcrübəm Nyu-Yorkda deyil, Corciya ştatında başladı.
.jpg)
Bu, necə bir təcrübə idi?
Əslində, buna görə bir qədər xoşbəxtəm. Nyu-York möhtəşəm şəhərdir. Burada çoxlu imkanlar, mühacirlər və maraqlı insanlar var. Amma əvvəlcə Corciyada yaşamasaydım, Amerikanın bu qədər spesifik, fərqli və özünəməxsus mühitini tanıya bilməzdim.
Düşünürəm ki, birbaşa Nyu-Yorka gəlsəydim, özümü çox itmiş hiss edərdim. Çünki burada rəqabətin nə qədər güclü olduğunu bilirdim. Hələ özümü sübut edə biləcək heç nəyim yox idi. Buna görə də daha kiçik bir şəhərdən başlamaq mənim üçün asan oldu.
Savannaya çatmazdan əvvəl Atlantada, hava limanının yaxınlığındakı oteldə bir gecə qaldım. Otağımda oturub çox məyus olmuşdum. Öz-özümə deyirdim: "İlahi, mən nə etmişəm?"
Sonra Savannaya gəldim. Bura həqiqətən çox gözəl şəhərdir. Günəş ağacların yarpaqları arasından süzülürdü. Mənzərəni görəndə öz-özümə dedim: "Bilirsən nə var? Gəlin görək burada bizi nə gözləyir".
Əlbəttə, bu, mənim üçün böyük dəyişiklik idi və çox şeyə uyğunlaşmalı oldum. SCAD-da oxumaq xoş idi. Zamanla Savannanın həyat tərzinə uyğunlaşdım. Daha yavaş yaşamaq, tələsməmək və orada keçirdiyim vaxtdan zövq almaq istəyirdim.
2026-cı ilə qayıdaq. Artıq film festivallarında iştirak edirsən. İlk iki filmin bir-birindən cəmi bir neçə həftə fərqlə nümayiş olunur. Bundan başqa, yaz aylarında daha bir layihədə çəkilmisən. Bu müddətdə səni ən çox təəccübləndirən, "Doğrudanmı, bunlar baş verir?" dedirdən anlar hansılar olub?
"The Debut" filminin çəkiliş meydançasında ilk günüm sanki Disneylendə olmaq kimi idi. İlk səhnəmdə Paul Giamattinin canlandırdığı personaj məndən qəhvə gətirməyimi istəyirdi.
Bu, bir qədər gərgin səhnə idi və çəkilişə məhz belə bir səhnə ilə başlamaq həyəcanımı azaltmağa kömək etdi.
Səhnədə otağa daxil oluram və filmdəki tamaşada iştirak edən bütün aktyorlar, eləcə də çəkiliş heyətinin üzvləri orada olur. Otağa girəndə məktəb illərim yadıma düşdü.
Nə üçün?
Həmin vaxt teatr müəllimim çox yaxşı insan idi, amma eyni zamanda həddindən artıq tələbkar idi. Bir dəfə Brodvey musiqili tamaşalarından ibarət qarışıq bir səhnə hazırlamışdıq.
Mən həmin tamaşada rol ala bilmədim. Çünki nə yaxşı oxuya, nə də lazımi səviyyədə aktyorluq edə bilirdim. Müəllimim mənə yazığı gəldiyi üçün rejissor köməkçisi rolunu verdi. Əslində, belə bir rol ümumiyyətlə yox idi.
Deyəsən, qəhvə gətirmək kimi bir işim də olmayıb. Amma tez-tez tamaşaların məşqlərinə baxmaq üçün orada otururdum. Dostlarımın və digər tələbələrin səhnədə çıxış etməsini izləyirdim.
Müəllimim sonradan mənə daha da yazığı gəldi və məni ansambla daxil etdi.
Bir dəfə "Grease" musiqili tamaşasından qrup səhnəsini məşq edirdik. Görünür, kifayət qədər gülümsəmirdim. Müəllimim isə davamlı olaraq mənə "Gülümsə!" deyə qışqırırdı.
Dostlarımın və həmkarlarımın qarşısında bu vəziyyət mənə çox pis təsir etdi. Nəhayət, bütün tamaşanı dayandırdım və əsəbiləşərək səhnədən çıxdım.
Sonra müəllimim məni pilləkəndə saxladı və belə dedi: "Eldar, mən səni görürəm. Səni başa düşürəm. Mən də vaxtilə sənin kimi idim".
O, Paul Giamattinin filmdə canlandırdığı personaja çox bənzəyirdi. Hətta onun da başında çox saç yox idi...
Nə barədə danışırdıq?
Səni ən çox təəccübləndirən, "Doğrudanmı, bunlar baş verir?" dedirdən anlar barədə.
Bəli, həmin otağa ilk dəfə daxil olduğum an mənim üçün həqiqətən də unudulmaz idi. Ondan sonra hər şey daha asan oldu.
Bir də, əlbəttə, "The Debut" filmindəki tərəf müqabilim Bernadette Peters... Hələ də onunla bağlı yaşadıqlarımı tam dərk edə bilməmişəm.
Qeyd edək ki, Eldar İsgəndərov Azərbaycanın Xalq artisti Şahmar Ələkbərovun nəvəsidir.
Müəllif: Nərmin Mahmudova (Milli.Az müxbir)