Kolumbiya millisinin sabiq qapıçısı David Ospina peşəkar futbolçu fəaliyyətini dayandırmaq qərarına gəlib.
Milli.Az xəbər verir ki, 38 yaşlı qolkiper karyerasını başa vurduğunu sosial şəbəkə hesabında yayımladığı açıqlama ilə ictimaiyyətə çatdırıb.
Ospina uzun illər ərzində Avropanın və Səudiyyə Ərəbistanının tanınmış klublarında çıxış edib. O, Kolumbiyanın "Atletiko Nasional", Fransanın "Nitsa", İngiltərənin "Arsenal", İtaliyanın "Napoli" və Səudiyyə Ərəbistanının "Əl-Nəsr" komandalarının şərəfini qoruyub.
İngiltərə karyerası dövründə "Arsenal"la iki dəfə ölkə kubokunu, üç dəfə isə Superkuboku qazanan qapıçı "Napoli" ilə İtaliya Kubokunun sevincini yaşayıb.
Kolumbiya millisinin heyətində 131 qarşılaşmada meydana çıxan təcrübəli futbolçu 2024-cü ildə Amerika Kubokunun gümüş medalını əldə edib. O, 2016 və 2021-ci illərdə keçirilən turnirlərdə isə bürünc medala layiq görülüb.
Qeyd edək ki, David Ospina 2026-cı ilin yayında Meksikanın "Atletiko" klubu ilə anlaşsa da, dirsəyindəki zədənin yenidən ağırlaşması səbəbindən yeni komandasında rəsmi matça çıxa bilməyib.
Müəllif: Tural Hüseyn (Milli.Az redaktor)