Əməkdar artist Firuzə İbadovanın səhhətində ciddi narahatlıq yaranıb. Müğənninin vəziyyəti ilə bağlı həmkarı İzzət Bağırov məlumat verib.
Milli.Az-ın məlumatına görə, İzzət Bağırov bildirib ki, sənətçi son iki aydır yataq şəraitində müalicə alır və bu müddət ərzində iki ağır əməliyyat keçirib. Onun sözlərinə görə, həkimlər Firuzə İbadovanın daha bir əməliyyata ehtiyacının olduğunu deyiblər.
Müğənni sənət dostlarını həmkarlarına dəstək olmağa çağırıb. O, Firuzə İbadovanın səhhəti yaxşı olduğu vaxtlarda onunla görüşən insanların indi də sənətkarı ziyarət etməsini arzuladığını bildirib.
İzzət Bağırov qeyd edib ki, Firuzə İbadovanın qızı Hülya anasının qayğısına qalır və gün ərzində onun yanında olur. Müğənni sənətçinin hər zaman mehriban insan olduğunu vurğulayaraq, belə vaxtlarda onun yanında olmağın hər kəsin borcu olduğunu söyləyib.
Müəllif: Tural Hüseyn (Milli.Az redaktor)