Nazik bulğur və mannanın ədviyyatlarla yoğrulub xüsusi forma verildiyi, suda bişdikdən sonra kərə yağlı, sarımsaqlı, pomidor-bibər tomatlı və nanəli sousla birləşdirilərək süzmə qatıq üzərində təqdim edildiyi əfsanəvi Qəhrəmanmaraş xörəyi - "Sömelek" küftəsi Türk mətbəxinin ən sevilən ləzzətlərindən biridir.
Milli.az inqrediyentləri təqdim edir:
Xəmir üçün: 1 stəkan xırda bulğur, 0.5 stəkan manna, 1 stəkan isti su, 100 q yağsız dana qiyməsi, 1 ədəd yumurta, 2 xörək qaşığı un, 1 çay qaşığı bibər tomatı, cirə (kimyon), pul bibər, qara istiot və duz.
Sous üçün: 2 xörək qaşığı kərə yağı, 1 xörək qaşığı zeytun yağı, 1 çay qaşığı pomidor tomatı, 1 çay qaşığı bibər tomatı, 1 çay qaşığı quru nanə, pul bibər, yarım çay stəkanı küftənin bişmə suyu.
Təqdimat üçün: 1.5 stəkan sarımsaqlı süzmə qatıq və xırda doğranmış təzə cəfəri.
Hazırlanma Qaydası
Xəmirin hazırlanması: Xırda bulğur və mannanın üzərinə isti su töküb qabın ağzını bağlayın, 10-15 dəqiqə dəmlənməyə qoyun. Şişmiş bulğura qiymə, yumurta, un, bibər tomatı və ədviyyatları əlavə edin. Əlinizi ilıq su ilə isladaraq məcun konsistensiyasına gələnədək 12-15 dəqiqə yaxşıca yoğurun.
Xəmirdən fındıqdan bir qədər böyük tikələr qoparıb əlinizi isladaraq çeçələ barmaq qalınlığında, ucları nazik kiçik silindr (sömelek) forması verin.
Bol duzlu və bir neçə damcı limon şirəsi əlavə edilmiş qaynar suda küftələri suyun üzünə çıxanadək (təxminən 7-8 dəqiqə) bişirin. Süzüb kənara alın (bişmə suyundan yarım çay stəkanı saxlayın).
Tavada kərə yağı və zeytun yağını əridib tomatları qovurun. Ayırdığınız bişmə suyunu, quru nanəni və pul bibəri əlavə edib sousu cızıldadın. Küftələri tavaya töküb 2-3 dəqiqə sousu hopdurana qədər ehtiyatla qarışdırın.
Servis qabının dibinə sarımsaqlı süzmə qatığı yayın. Üzərinə isti küftələri dərhal düzün, tavada qalan aromatik yağı gəzdirib təzə cəfəri ilə bəzəyərək süfrəyə verin.
Müəllif: Ülkər Vəliyeva (Milli.Az redaktor)