Yapon mətbəxinin estetik və fərqli bişirmə texnikasını əks etdirən bu özəl resept yumurta ağının zərf kimi sarısını bükməsi prinsipinə əsaslanır.
Milli.Az xaricdən tam bişmiş, daxildən isə axıcı sarısı olan yapon yumurtasını hazırlamağın 4 əsas mərhələsini təqdim edir:
Ağının və sarısının ayrılması
Yumurtanın sarısı partlamadan zərifcə ağından ayrılır. Ayrılan yumurta ağına bir çimdik duz əlavə edilib yüngülcə qarışdırılır, lakin köpükləndirilmir. Ağın hamar maye halında qalması tavada bərabər lay əmələ gətirməsi üçün vacibdir.
Aşağı istilikdə nazik layın bişirilməsi
Yapışmayan tava aşağı dərəcəli odda qızdırılır və yumurta ağı tavaya yayılır. Yüksək istilik ağın tez qabarmasına səbəb olacağı üçün od mütləq az olmalıdır. Ağın altı bişib üstü hələ nəm və parlaq qaldıqda növbəti mərhələyə keçilir.
Sarının yerləşdirilməsi və zərf formasında bükülməsi
Tavadakı ağın tam ortasına sağlam qalmış yumurta sarısı qoyulur. Spatula vasitəsilə ağın kənarları sarının üzərinə doğru qatlanaraq kvadrat və ya düzbucaqlı zərf forması verilir. Qatlanan hissələrin yapışması üçün yumurta çevrilir və qısa müddət də bişirilir.
İsti təqdimat
Yumurtanın üzərinə xırda doğranmış yaşıl soğan, küncüt və ya qara istiot səpilərək isti halda süfrəyə verilir. Bıçaqla kəsildikdə daxildəki isti sarının xaricə axması həm vizual, həm də dad baxımından əla nəticə verir.
Müəllif: Ülkər Vəliyeva (Milli.Az redaktor)