Hind okeanının cənub-qərbində, Mavriki adası yaxınlığında 400-500 metr dərinlikdə yeni fənər akulası növü aşkarlanıb. Tədqiqatçılar tərəfindən "Etmopterus bulbosus" adı verilən bu yeni canlı elmi aləmdə böyük maraq doğurub.
Milli.Az xəbər verir ki, 21,5 santimetr uzunluğunda olan dişi akulanı digər növlərdən fərqləndirən ən əsas cəhəti onun böyük, yuvarlaq və şişkin burnudur.
Döş üzgəclərindən başlayaraq ilk bel üzgəcinə qədər uzanan kiçik, tikanşəkilli dəri çıxıntıları və bədənindəki xüsusi naxışlar növün xarakterik əlamətləridir.
Mitoxondrial DNT analizi nəticəsində bu canlı ilə eyni qrupdan olan digər akulalar arasında ən azı 10,29% genetik fərq olduğu müəyyən edilib.
Aşkar edilən nümunə hələlik yalnız bir dişi fərddən ibarət olduğu üçün növün qidalanma vərdişləri, populyasiya həcmi və yetkinlik ölçüləri haqqında ətraflı məlumat əldə etmək üçün daha çox araşdırmaya ehtiyac var.
Müəllif: Ülkər Vəliyeva (Milli.Az redaktor)