ABŞ tərəfindən saxlanılan Venesuela Prezidenti Nikolas Maduronun həyat yoldaşı Siliya Flores Amerika həbsxanasında ürək tutması keçirib.
Milli.Az xəbər verir ki, bu barədə "Associated Press" (AP) Floresin vəkillərinə istinadən məlumat yayıb.
Vəkillərin sözlərinə görə, 69 yaşlı Siliya Flores iyul ayında ürək tutması keçirib. Onlar bildiriblər ki, Floresin həbsxana şəraitində müalicəsi mümkün olmayan ürək problemləri var. Həmçinin qeyd olunub ki, o, həbsdə olduğu müddətdə 11 kiloqram çəki itirib.
Floresin müdafiəçiləri onun ev dustaqlığına keçirilməsi üçün müraciət etməyə hazırlaşırlar.
Qeyd edək ki, yanvarın 3-də ABŞ Venesueladakı mülki və hərbi obyektlərə zərbələr endirib. ABŞ xüsusi təyinatlıları Nikolas Maduronu həyat yoldaşı ilə birlikdə saxlayaraq ölkədən çıxarıblar.
Yanvarın 5-də Maduro və Flores Nyu-York ştatının Cənub Dairəsi üzrə federal məhkəmədə hakim qarşısına çıxarılıblar. Onlara narkotik ticarətində iştirak ittihamı irəli sürülüb. Hər iki şəxs ittihamları qəbul etməyib.
Hazırda Venesuelada dövlət başçısının səlahiyyətlərini Maduronun prezidentliyi dövründə ölkənin icraçı vitse-prezidenti olmuş Delsi Rodriqes həyata keçirir.
Müəllif: Malik Məlikov (Milli.Az redaktor)