Evdə turşu qoyarkən ən çox qarşılaşılan problemlərdən biri tərəvəzlərin sərtliyini itirərək yumşalmasıdır. Ənənəvi reseptlərdə bankanın dibinə əlavə edilən bir neçə quru noxud isə fermentasiyanın daha nizamlı başlamasına kömək etmək üçün uzun illərdir istifadə edilən üsullardan biridir.
Milli.Az xəbər verir ki, noxud xüsusilə xiyar, kələm və qarışıq tərəvəz turşularında üstünlük təşkil edir. Lakin turşunun xırt-xırt qalmasını təmin edən yeganə amil noxud deyil; tərəvəzlərin təzəliyi, duzlu suyun düzgün hazırlanması və saxlama temperaturu da nəticəyə birbaşa təsir edir.
Turşu hazırlanarkən bankanın dibinə bir neçə ədəd quru noxud qoymaq ənənəvi üsullar sırasındadır. Noxudun fermentasiya zamanı fəaliyyət göstərən mikroorqanizmlərin fəaliyyətini dəstəkləyərək mayalanma prosesinin başlamasına kömək edə biləcəyi bildirilir. Noxud sayəsində fermentasiya tezləşir və turşunun özünəməxsus turşməzə aroması yaranmağa başlayır. Lakin bankaya həddindən artıq noxud qoymaq lazım deyil. İstifadə olunacaq miqdar bankanın böyüklüyünə görə dəyişsə də, bir neçə quru noxud kifayət edə bilir.
Turşunun yumşalmasının əsl səbəbləri
Turşunun qısa müddətdə yumşalmasında səhv duz nisbəti, həddindən artıq isti mühit, tərəvəzlərin kifayət qədər təzə olmaması və fermentasiya zamanı yarana bilən arzuolunmaz maya və kiflər təsirli ola bilir. Buna görə də turşu qoyularkən sərt və təzə tərəvəzlərin seçilməsi önəm daşıyır. Tərəvəzlərin tamamilə duzlu suyun altında saxlanması və bankanın sərin yerdə saxlanması da vacibdir. Xüsusilə isti mühit fermentasiyanı lazım olduğundan çox sürətləndirərək tərəvəzlərin zamanla yumşalmasına yol aça bilər.
Müəllif: Ülkər Vəliyeva (Milli.Az redaktor)