Sosial şəbəkələrdə sükan arxasında yuxulayan sürücünün törətdiyi qəzanın görüntüləri yayılıb.
Milli.Az xəbər verir ki, kadrlarda sürücünün idarə etdiyi avtomobilin hərəkət istiqamətindən çıxaraq yol kənarındakı maneəyə çırpıldığı görünür.
Baş Dövlət Yol Polisi İdarəsinin əməkdaşı Rövşən Tağıyev bildirib ki, yuxululuq sürücünün diqqətini və reaksiyasını əhəmiyyətli dərəcədə zəiflədir. Onun sözlərinə görə, cəmi bir neçə saniyəlik mürgüləmə belə avtomobilin nəzarətsiz hərəkət etməsinə və ağır qəzanın baş verməsinə səbəb ola bilər.
O, sürücülərə uzun səfərlərdən əvvəl kifayət qədər istirahət etməyi, yolda yorğunluq və yuxululuq hiss etdikdə isə təhlükəsiz yerdə dayanaraq dincəlməyi tövsiyə edib.
Qeyd edək ki, yuxulu halda avtomobil idarə etmək həm sürücünün, həm sərnişinlərin, həm də digər hərəkət iştirakçılarının həyatı üçün ciddi təhlükə yaradır.
Müəllif: Nərmin Mahmudova (Milli.Az müxbir)