Avqust ayında ölkə üzrə orta aylıq temperaturun iqlim normasına yaxın, bəzi bölgələrdə isə normadan bir qədər yüksək olacağı gözlənilir. Yağıntının miqdarının isə əsasən iqlim normasına uyğun olacağı proqnozlaşdırılır.
Milli.Az xəbər verir ki, Milli Hidrometeorologiya Xidməti avqust ayı üzrə hava proqnozunu açıqlayıb.
Ayın ilk günlərində əksər rayonlarda yağmursuz hava şəraiti üstünlük təşkil edəcək. Lakin bəzi dağlıq və dağətəyi ərazilərdə qısamüddətli yağış yağacağı, şimşək çaxacağı ehtimal olunur.
Bakıda və Abşeron yarımadasında orta aylıq temperaturun 26-28°C təşkil edəcəyi gözlənilir. Gecə saatlarında temperaturun 22-27°C, gündüz isə 30-35°C olacağı, ayın birinci və ikinci ongünlüyünün bəzi günlərində isə 40°C-yə yaxın istilərin müşahidə ediləcəyi bildirilir.
Naxçıvan, Gəncə-Qazax, Aran və Mərkəzi Aran bölgələrində gündüz saatlarında havanın temperaturunun bəzi günlərdə 41°C-yə yaxınlaşacağı proqnozlaşdırılır.
Qarabağ və Şərqi Zəngəzur iqtisadi rayonlarında orta aylıq temperaturun 22-25°C, dağətəyi ərazilərdə isə 23-25°C olacağı gözlənilir. Bu bölgələrdə də bəzi günlərdə temperaturun 35-38°C-yə qədər yüksələcəyi ehtimal edilir.
Şimal və şimal-qərb rayonlarında havanın əsasən isti keçəcəyi, bəzi ərazilərdə isə aylıq yağıntının normadan bir qədər çox olacağı gözlənilir.
Cənub bölgəsində də temperaturun iqlim normasına yaxın və bir qədər yüksək olacağı, gündüz saatlarında bəzi günlərdə 38°C-yə qədər yüksələcəyi bildirilir.
Ümumilikdə, avqust ayında ölkə ərazisində isti hava şəraitinin üstünlük təşkil edəcəyi, yağıntının isə əsasən iqlim normasına uyğun olacağı gözlənilir.
Müəllif: Nərmin Mahmudova (Milli.Az müxbir)