Vint seçərkən çoxları yalnız onun ölçüsünə və formasına diqqət yetirir. Halbuki gümüşü, qızılı və ya qara rəngdə olmaları sadəcə estetik bir seçim deyil. Mütəxəssislərin fikrincə, bu rənglər vintlərə tətbiq olunan səth emalı haqqında vacib məlumatlar verir; paslanmaya qarşı dözümlülüyə, möhkəmliyə və istifadə sahəsinə birbaşa təsir edir.
Milli.Az xəbər verir ki, eyni rəngdə görünən iki vint belə tamamilə fərqli xüsusiyyətlərə malik ola bilər. Buna görə də, yalnız rənginə baxaraq seçim etmək, xüsusilə nəmli və ya açıq havadakı mühitlərdə paslanma, birləşmənin zəifləməsi və erkən aşınma kimi problemlərə yol aça bilər. Mütəxəssislər vint seçərkən materialın növünü, istifadə olunacağı mühiti və istehsalçının texniki xüsusiyyətlərini mütləq yoxlamağı tövsiyə edirlər.
Rənglər nə deməkdir?
Gümüşü rəngli vintlər: Adətən sink örtüklü və ya paslanmayan poladdan hazırlanmış modelləri ifadə edir. Bu cür vintlər daxili məkanlarda korroziyaya (paslanmaya) qarşı qorunma təmin edir. Lakin onların daha ağır şərtlərə dözümlülüyü tətbiq olunan örtüyün növünə görə dəyişir.
Qızılı rəngli vintlər: Çox vaxt tunc ərintisindən hazırlanır və ya polad üzərinə sarı sink örtük çəkilərək bu görünüş əldə edilir. Dekorativ məqsədlərlə tez-tez seçilən bu vintlərin möhkəmliyi, istifadə olunan əsas metaldan və örtük keyfiyyətindən asılı olaraq dəyişir.
Qara rəngli vintlər: Qara oksid, fosfatlaşdırma və ya xüsusi boya kimi müxtəlif səth emalları ilə istehsal olunur. Bu emallar işıq əksini azaldır və müəyyən dərəcədə korroziyadan qoruyur. Lakin qara rəngdə olması özlüyündə vintin daha dözümlü olduğu mənasına gəlmir. Bəzi qara oksid örtüklər uzunömürlü olması üçün yağ və ya əlavə qoruyucu təbəqələrə ehtiyac duyur.
Mütəxəssislər vurğulayırlar ki, vint seçərkən rəng yalnız ilkin ipucu kimi qiymətləndirilməlidir. Əsas müəyyənedici amil məhsulun texniki xüsusiyyətləri, mexaniki dözümlülük sinfi və istifadə olunacağı mühitdir.
Müəllif: Ülkər Vəliyeva (Milli.Az redaktor)