Marketlərdə portağalların əksəriyyətinin qırmızı və ya narıncı rəngli torbalarda satılması təsadüfi deyil. Alimlərin fikrincə, bu rəng seçimi meyvənin daha yetişmiş, canlı və iştah açıcı görünməsini təmin edən sadə, lakin təsirli bir vizual aldatma üsuluna əsaslanır.
Milli.Az xəbər verir ki, qırmızı və ya narıncı torba portağal qabığının rəngini olduğundan daha tünd və parlaq göstərir. Hətta bir qədər yaşılımtıl və ya tam yetişməmiş portağallar belə, torbanın içində daha narıncı göründüyü üçün istehlakçılarda daha təzə və sulu olduğu təəssüratı yaradır. Oxşar üsul limonlarda da istifadə olunur. Limonlar adətən sarı torbalarda satılır, çünki qırmızı torba limonun rəngini təbii olmayan narıncı tona çevirə bilər.
Bu vəziyyət "konfeti illüziyası" (Confetti Illusion) və ya oxşar rəng qavrama təsirləri ilə izah edilir. Obyektin üzərini örtən nazik rəngli xəttlər beynin altdakı rəngi fərqli qavramasına səbəb olur. Nəticədə, portağalın əsl rəngi dəyişməsə də, gözümüzə daha parlaq və daha yetişmiş görünür.
Almaniyanın Giessen Universitetinin qavrayış psixoloqu Karl Gegenfurtner apardığı araşdırmada bu təsirin marketlərdə illərdir istifadə edildiyini ortaya qoydu. Tədqiqatçı, torbanın içində canlı narıncı görünən portağalların torbadan çıxarıldıqdan sonra nəzərəçarpacaq dərəcədə daha yaşılımtıl göründüyünü fotolarla sübut etdi.
Eyni üsul naringi, qreypfrut və oxşar rəngdə olan bəzi digər sitrus meyvələrinə də tətbiq olunur. Mütəxəssislər, bu üsulun meyvənin dadını və ya keyfiyyətini dəyişmədiyini, yalnız istehlakçının ilk baxışdakı rəng qavramasına təsir edərək məhsulu daha cəlbedici göstərdiyini bildirirlər.
Müəllif: Ülkər Vəliyeva (Milli.Az redaktor)