Yeni mövsümə iddialı hazırlaşan "Qalatasaray" heyətini dünya səviyyəli bir ulduzla gücləndirməyə hazırlaşır. Sarı-qırmızılılar bir müddətdir gündəmlərində olan "Liverpul"un kapitanı Virgil van Dayk üçün yenidən hərəkətə keçiblər.
Milli.Az xəbər verir ki, hollandiyalı ulduz müdafiəçi daha əvvəlki danışıqlarda Dünya Çempionatından sonrasını işarə etmişdi. Lakin "Qalatasaray" rəhbərliyi tələsir və turnir bitməmiş bu transferi bitirmək istəyir.
Van Daykın "hə" deməsi ilə "Qalatasaray" rəsmiləri dərhal "Liverpul" ilə rəsmi danışıqlara başlayacaq.
Klubun əsas məqsədi 2026-2027 mövsümündə müdafiənin mərkəzində Van Dayk - Davinson Sançes dueti yaratmaqdır. Bu transfer baş tutarsa, Abdülkerim Bardakçı da rotasiyada yer alacaq və komanda Çempionlar Liqası ərəfəsində müdafiə xəttində inanılmaz bir gücə sahib olacaq.
Xarici oyunçu limitinin çətinliklərinə baxmayaraq, "Qalatasaray" rəhbərliyi Van Daykın təcrübəsinin komandaya böyük töhfə verəcəyinə inanır. 34 yaşlı ulduzun heyətə qatılması komandanın müdafiə keyfiyyətini artıracaq.
Müəllif: Ülkər Vəliyeva (Milli.Az redaktor)