Azərbaycanda donorluq mədəniyyətinin təşviqi və insan həyatının xilası istiqamətində növbəti humanist addım atılıb. Ağır avtomobil qəzası keçirmiş və müəyyən sağlamlıq problemləri ilə mübarizə aparan bir vətəndaş rəsmi şəkildə bütün orqanlarını bağışladığını elan edib.
Milli.Az xəbər verir ki, ölkədə orqan transplantasiyası sahəsindəki son nailiyyətləri, xüsusilə uğurlu ürək köçürülməsi əməliyyatlarını yaxından izlədiyini bildirən Azərbaycan Beynəlxalq Avtomobil Daşıyıcıları Assosiasiyasının mətbuat katibi Ruslan Eldaroğlu bu qərarın verilməsində həm fərdi sınaqların, həm də tibbi tərəqqinin böyük rolu olduğunu qeyd edib.
O, qərarını bu sözlərlə əsaslandırıb: "Düşündüm ki, bir gün mənim artıq ehtiyac duymadığım bir orqan başqa bir insanın həyata yenidən tutunmasına, bir övladın valideyninə qovuşmasına səbəb ola bilər. Orqan bağışı həyatın ən dəyərli və mənalı paylaşımıdır."
Mütəxəssislər qeyd edirlər ki, bir donor bir neçə insanın həyatını xilas etmək, onlarla ailəyə yenidən ümid bəxş etmək gücünə malikdir. Hazırda Azərbaycanda minlərlə xəstə uyğun donor tapılması üçün gözləmə siyahısındadır.
Bu nümunəvi addımın cəmiyyətdə maariflənməyə töhfə verəcəyi və orqan bağışı ilə bağlı stereotiplərin qırılmasına kömək edəcəyi gözlənilir. Donor vurğulayıb ki, tək bir qərar sadəcə bir fərdin deyil, bütöv bir ailənin taleyini dəyişə bilər.
Milli.Az