"Sadat Quliyev və onun adamları məni və ailəmi ölümlə hədələyir" – "BT News" kanalının müəllifi ilə MÜSAHİBƏ

Son vaxtlar "Девичья Башня"  ("Qız Qalası") teleqram kanalının xarici dairələrin və ölkəmizin bədxahlarının sifarişi ilə aktiv şəkildə anti-Azərbaycan fəaliyyəti ilə məşğul olması barədə yazmışdıq. Bir çox yerli istifadəçilər də buna diqqət yetirərək kanalın admini Sadat Quliyevin fəaliyyətini kəskin tənqid ediblər. "Девичья Башня"nın paylaşımlarına etiraz edən və onu tənqid edən ilk şəxslərdən biri "BT News" kanalının müəllifi Asif Bayramov olub. Bu gün məlum olub ki, bu tənqidlərdən sonra Asif Bayramovun və onun ailəsinin ünvanına Quliyevin şəbəkəsi ilə əlaqəli şəxslər tərəfindən hədə-qorxular gəlməyə başlayıb.

Bayramov bu barədə öz teleqram kanalında paylaşım edib. "Девичья Башня"nın qalmaqallı fəaliyyəti getdikcə böyüyür. Baş verənlərin təfərrüatını öyrənmək üçün Day.Az saytı Asif Bayramovla əlaqə saxlayıb.

Onun sözlərinə görə, Sadat Quliyev təkcə "Девичья Башня" kanalına sahib deyil. Bu, Rusiyadakı üçüncü tərəflərin sifarişi ilə aktiv şəkildə anti-Azərbaycan təbliğatı aparan bütöv bir kanallar şəbəkəsidir. Və bu şəxslər hazırda onun həyatını təhdid edirlər.

"Ailəm təhlükədədir. Mənə qarşı təhlükəli bir adam göndəriblər. O, aprelin 26-dan bəri Azərbaycandadır. Bu şəxs həm internetdə, həm də real həyatda məni və ailəmi hədələyib. O, Rusiya vətandaşıdır və anladığım qədərilə Azərbaycanda qalma müddəti məhduddur. Ola bilsin ki, yaxın günlərdə ölkəni tərk etsin. Ona görə də hesab edirəm ki, hüquq-mühafizə orqanları bu vəziyyətə diqqət yetirməlidir. Əlimdə olan bütün materialları onlara təqdim etmək niyyətindəyəm, çünki söhbət real təhdidlərdən gedir", - deyə Bayramov bildirib.

Həmsöhbətimiz qeyd etdi ki, o, hədəf gələn şəxslərin hamısının adını bilmir - onlar onlayn məkanda gizlənirlər və hamısını Quliyev idarə edir.

"Mən Sadatla İkinci Qarabağ müharibəsi dövründə tanış olmuşam. Özləri mənimlə əlaqə saxladılar və mən onları əsl vətənpərvər hesab etdim. Yaxınlaşdıq, hətta ailəvi səviyyədə dostluq münasibətləri saxladıq - ünsiyyətdə olduq, danışdıq, hamımızın vətənpərvər olduğunu düşündük. Amma mən necə də böyük səhv etmişəm. Sonradan anladım ki, onlar qətiyyən Azərbaycanın maraqlarına işləmirlər.

Birincisi, vurğulamaq istəyirəm ki, onların heç biri bizim ölkədə yaşamır. Hamısı Rusiyada məskunlaşıb, Rusiyayönümlü fəaliyyət göstərir, həm erməniləri, həm də Azərbaycanlıları söyürlər. Onlar məni 'Ukraynanı dəstəkləməkdə' də ittiham edirdilər, halbuki mən hər zaman ilk növbədə Azərbaycanın maraqlarından çıxış edirəm və həqiqəti yazıram. Rusiya-Ukrayna münaqişəsində heç bir tərəfi seçməmişəm. Mənim üçün əsas prioritet hər zaman öz dövlətimizin maraqlarıdır. Bundan sonra onlardan uzaqlaşdım.

İkincisi, sonradan mənə məlum oldu ki, bizim sözdə 'dostluq' etdiyimiz dövrdə onlar mənim şəxsi məlumatlarımı toplayıb, hansısa 'kompromat' düzəltməyə çalışıblar. Üstəlik, onların əlində mənim hələ tanışlığımızdan çox-çox əvvəl sosial şəbəkələrdən sildiyim məlumatlar var. Bu məlumatlar internetdə yox idi. Bu, hələ Telegram-dan əvvəlki dövrə aid idi. Məndə sual yarandı: bu məlumatlar necə onların əlinə keçib? Həmin məlumatlar 15-20 il əvvəl silinib. Deməli, onlar hələ 'dostluqdan' əvvəl mənə qarşı müəyyən təzyiq rıçaqı qazanmaq üçün haqqımda məlumat toplayıblar. Əllərində skrinşotlar, şəxsi məlumatlarım var. Həm də bu məlumatların bir hissəsi münasibətlərimizin yaxşı olduğu 2021-ci ilə aiddir. Buradan belə nəticəyə gəlirəm ki, onlar məni şantaj etmək və gələcəkdə Azərbaycan dövlətinə qarşı öz maraqları naminə istifadə etmək üçün aktiv şəkildə kompromat toplayıblar", - deyə Bayramov danışıb.

Onun sözlərinə görə, o, bütün bunları faktlar və skrinşotlarla sübut edə bilər. Həmin sübutların bəzilərini redaksiyamıza da göndərib. Sübutlardan göründüyü kimi, Quliyevin şəbəkəsi uzun müddətdir ki, Asif Bayramovu aktiv şəkildə ələ salır. Sadatın nəzarətində olan teleqram kanallarında mütəmadi olaraq təhqirlər, şəxsi məlumatlar və hətta fotoşopla düzəldilmiş şəkillər yayımlanır.

"Mən sizinlə yalnız kiçik bir hissəni paylaşıram, lakin əlimdə materiallar çoxdur, kifayət qədər çoxdur. Və mən hamısını hüquq-mühafizə orqanlarına təhvil verəcəyəm", - deyə "BT News" müəllifi vurğulayıb.

"Девичья Башня"nın WUF13 (Ümumdünya Şəhərsalma Forumu) tədbirinin başladığı gün yağan yağışla bağlı etdiyi təxribat xarakterli paylaşıma toxunan Bayramov qeyd etdi ki, bu forum ölkəmizin nüfuzu üçün çox mühüm hadisədir:

"Biz vaxtaşırı Bakıda baş verən bu və ya digər hadisələr, o cümlədən güclü yağışlar barədə xəbərlər, foto və videolar paylaşırıq. Lakin bu tədbirin ölkəmizin nüfuzu üçün daşıdığı önəmi dərk edərək, vətənpərvərlik hisslərindən çıxış edərək, bu dəfə yağış görüntülərini paylaşmamaq qərarına gəldik. Buna baxmayaraq, mən və komandam gördük ki, "Девичья Башня" və Sadat Quliyevin digər kanalları qonaqların stadion fonundakı şəkillərini paylaşaraq Bakını kütləvi şəkildə tənqid etməyə başladılar.

"Девичья Башня" təkcə Azərbaycanda deyil, əsasən postsovet ölkələrində də geniş oxunur, onu digər xalqların nümayəndələri, o cümlədən ermənilər də oxuyur. Bunu bilə-bilə sən, Sadat, öz ölkənə, Azərbaycana qarşı qaralama kampaniyası aparırsan.

Mən buna səssiz qala bilmədim və "Девичья Башня"nı tənqid edən bir paylaşım etdim. Elə həmin gün şəbəkədə mənim şəxsi məlumatlarım, şəkillərim və ailəmin fotoları yayılmağa başladı. Hətta mənim azyaşlı övladımı belə təhqir etdilər. Dünyasını dəyişmiş valideynlərimin ölümü ilə lağ edir, ləyaqətimi alçaltmağa çalışırdılar. Onlar hər şeyi edirlər ki, mən susum və onların bu çirkin fəaliyyəti barədə bir daha yazmayım", - deyə Bayramov bildirib.

O qeyd edib ki, Sadat Quliyevin qrupu təxminən 20-30 nəfərdən ibarət bir "teleqram mafiyası"dır: "Onlar özlərini vətənpərvər kimi təqdim edir, müəyyən tezislərdən, sxemlərdən və hətta feyklərdən (yalan xəbərlərdən) istifadə edirlər. Məsələn, onlar xəstə insanlar üçün vəsait toplayırlar, lakin mən şübhələnirəm ki, toplanan pullar elə öz ciblərinə gedir. Çünki hər yerdə eyni kart və ya hesab nömrəsi göstərilir. Niyə onlar köməyə ehtiyacı olan həmin şəxsin öz bank məlumatlarından istifadə etmirlər?"

Bayramovun sözlərinə görə, Quliyev və onun adamları onun Azərbaycanın maraqlarını müdafiə etməsinin əleyhinədirlər:

"Məni üzr istəməyə, video çəkməyə, səs yazısı yazmağa məcbur etməyə çalışırlar. Paralel olaraq, guya mənim dövlətimizin maraqlarına qarşı çıxış etdiyim, ölkəmin əleyhinə danışdığımla bağlı saxta məlumatlar yayırlar. Belə bir şey heç vaxt olmayıb. Bu, fotoşopdur. Əksinə, mən və komandam Qarabağ müharibəsi dövründə kifayət qədər böyük səs-küyə səbəb olan materiallar dərc etmişik. Məsələn, Araik Arutyunyan barəsində ifşaedici materialları məhz biz yaymışdıq. Müharibə zamanı biz həmçinin xəritələrlə işləyir, düşmənin hərbi obyektlərini və digər materialları üzə çıxarırdıq. Bizi diqqətlə izləyənlər kanalımızın və səhifələrimizin necə fəaliyyət göstərdiyini yaxşı bilirlər.

Buna baxmayaraq, indi bizim adımızı tamamilə qaralamağa çalışırlar, çünki biz onların etdikləri ilə razı deyilik. Biz cənab Prezidentin Ermənistanla sülhün vacibliyini vurğulayan xəttini dəstəkləyirik. Quliyevin mafiyası isə bu sülhlə razı deyil. Onlar bir tərəfdən Azərbaycanı nüfuzdan salmağa çalışaraq, digər tərəfdən isə erməniləri təhqir edərək sülh prosesinə zərbə vurmağa cəhd edirlər".

Onun sözlərinə görə, Sadat Quliyev tərəfindən qurulan bu teleqram strukturu xarici qüvvələr tərəfindən idarə olunur, tezislər və əmrlər oradan gəlir:

"Sadatın hələ 2020-ci il müharibəsindən əvvəl də Azərbaycana qarşı paylaşımları olub. Məsələn, o, bir dəfə 'Baqramyan-26' kanalının Nikol Paşinyanın dondurulmuş rejimdəki qondarma 'DQR'-in 'eks-prezidenti' Bako Saakyanla görüşməsi barədə paylaşımını reaktiv şəkildə paylaşmışdı (repost etmişdi). Və bu cür, açıq-aşkar anti-Azərbaycan fəaliyyətinin göründüyü postlar çoxdur. Bir vaxtlar belə bir tezis yayılırdı ki, guya '10 milyon azərbaycanlı Rusiyada yaşayan azərbaycanlılara nifrət edir'. Bu təbliğat xüsusilə AZAL təyyarəsi vurulduqdan sonra güclənməyə başladı. Mən özüm Rusiyadan gəlmiş biriyəm. Rusiyada çoxlu tanışım var. Və mən anlaya bilmirəm ki, Rusiyada yaşayan azərbaycanlıların əleyhinə necə nəsə demək olar? Bu absurddu. Bu hardan qaynaqlanır? Erməni info-kanallarını idarə edən xarici qüvvələr var və eyni prinsiplə - 'parçala və hökm sür' prinsipi ilə Azərbaycan kanallarını da idarə etməyə çalışanlar var. Lakin bu cür təbliğat gec-tez iflasa uğrayacaq, çünki Azərbaycan xalqı öz Vətəninə bağlıdır. Nə baş verməsindən asılı olmayaraq, azərbaycanlıların mütləq əksəriyyəti öz dövlətinə və öz xalqına qarşı getməz", - deyə Bayramov əlavə edib.

Sonda o qeyd etdi ki, ailəsinin həyatından narahat olduğu üçün yaxın vaxtlarda toplanmış bütün faktları və məlumatları Azərbaycanın hüquq-mühafizə orqanlarına təqdim edəcək.

"Mənə problem yaradacaqlarını deyirdilər. Çox şeyi heç dilə gətirə bilmirəm. Mən istəyirəm ki, hazırda Bakıda olan bu şəxslər saxlanılsın. Əgər bu baş versə, bütün bu zəncir dağılacaq", - deyə Asif Bayramov sözlərini yekunlaşdırıb.

Milli.Az