Azərbaycan televiziya məkanının ən çox müzakirə olunan realiti layihələrindən biri olan "Maşın" yenidən tamaşaçıların qarşısına çıxmağa hazırlaşır.
Milli.Az xəbər verir ki, bu barədə məlumatı Xəzər TVnin baş prodüseri Toğrul Məmmədov sosial şəbəkə hesabında paylaşıb. O, layihənin yayımlanacağı tarixi açıqlamasa da, paylaşımına "loading" qeydi əlavə edərək proqramın yaxın zamanda başlayacağına işarə edib.
Qeyd edək ki, layihənin rəhbəri və aparıcısı Xalq artisti Murad Dadaşovdur. Uzun illər müxtəlif telekanallarda yayımlanan şou Azərbaycan televiziya tarixinin ən səs-küylü layihələrindən biri hesab olunur.
2005-ci ildən etibarən yayımlanan "Maşın" şousunun indiyədək 16 mövsümü təqdim olunub və yüzlərlə iştirakçı layihədə yer alıb. İlk mövsümlərdə sıravi vətəndaşlar yarışsa da, sonrakı buraxılışlarda əsasən tanınmış simalar mübarizə aparıblar.
Layihənin son mövsümü 2019-cu ildə "Maskarad" adı ilə yayımlanmışdı və həmin buraxılışın qalibi Suna Kasımoğlu olmuşdu.
Milli.Az