Avstraliyada yol qəzalarını azaltmaq üçün diqqətçəkən yeni bir sistem tətbiq edilməyə başlanıb. "Əjdaha dişi" (Dragon's Teeth) adı verilən bu üsulda yolun kənarlarına üçölçülü (3D) görünüşə malik ağ üçbucaqlar çəkilir. Bu optik illüziya sayəsində sürücülər yolu olduğundan daha dar görür və instinktiv olaraq sürəti aşağı salırlar.
Milli.Az bu maraqlı yol təhlükəsizliyi sisteminin detallarını təqdim edir:
Yol fiziki olaraq daralmır
"Əjdaha dişi" sistemi tamamilə psixoloji təsir üzərində qurulub. Yolun eni dəyişməsə də, kənarlardakı üçbucaq fiqurlar sürücülərdə sıx və dar bir məkanda irəlilədikləri hissini yaradır. Mütəxəssislər bildirirlər ki, sürücülər bu görüntü səbəbindən refleks olaraq ayağını qazdan çəkir. Bu sistemin ən böyük üstünlüyü radar, sürət həddini aşma cəriməsi və ya süni maneələr (tramplinlər) olmadan sürəti azalda bilməsidir.
Gecə saatlarında daha effektivdir
Rəsmilərin açıqlamasına görə, ağ üçbucaqlar xüsusilə gecə vaxtı avtomobil işıqları altında daha güclü bir optik təsir yaradır. Bu səbəbdən sistemin gecə qəzalarını ciddi şəkildə azaldacağı gözlənilir. İlkin ölçmələr artıq bəzi bölgələrdə nəqliyyat vasitələrinin sürətində nəzərəçarpacaq dərəcədə azalma olduğunu göstərir.
Bənzər sistemlər daha əvvəl Hollandiya və İngiltərə kimi bəzi Avropa ölkələrində də sınaqdan keçirilib. Lakin Avstraliyada tətbiq olunan 3D versiya daha müasir və təsirli hesab olunur. Əgər sınaq müddəti uğurla tamamlanarsa, bu tətbiqin ölkənin bütün ştatlarında genişləndirilməsi planlaşdırılır.
Hazırda "Əjdaha dişi" tətbiqi həm effektivliyi, həm də fərqli yanaşması ilə sosial mediada ən çox müzakirə olunan yol təhlükəsizliyi həllərindən birinə çevrilib.
Lalə Qüdrətova
Milli.Az