Almaniyanın Hannover şəhərinin rəhbərliyi təmizlənmiş çirkab sularının daşıdığı istilik enerjisini geri qazanaraq mərkəzi isitmə sisteminə ötürməyi hədəfləyir. Bu sistem sayəsində minlərlə mənzilin isidilmə və isti su ehtiyacı ətraf mühitə zərər vermədən ödəniləcək.
Milli.Az xəbər verir ki, mətbəx kranlarından, duşlardan və tualetlərdən gələn çirkab suları il boyu sabit temperaturda olur. Bu sabitlik sistemi yüksək dərəcədə səmərəli edir.
Təmizlənmə müəssisəsindən çıxan su çaya axıdılmazdan əvvəl 30 MVt gücündə olan nəhəng istilik nasosundan keçirilir.
Nasos sudakı enerjini mərkəzi isitmə şəbəkəsinə ötürür.
Çaya buraxılan suyun temperaturu aşağı salındığı üçün çaydakı təbii ekosistem və canlı həyat da qorunmuş olur.
Hannoverin hazırkı mərkəzi isitmə sistemi kifayət qədər genişdir, lakin bu layihə ilə daha da böyüyəcək.
Hazırda 360 kilometr olan mərkəzi isitmə xətti 550 kilometrə çatdırılacaq.
Yeni sistem ildə təxminən 235 GVt-saat (GWh) istilik enerjisi istehsal edəcək.
Bu enerji 13-15 min mənzilin həm isti su, həm də isidilmə ehtiyacını tam qarşılayacaq. Hazırda şəbəkə 35 min mənzilə xidmət edir.
Layihənin icrası zamanı mühəndislər fiziki bir maneə ilə - Leyne (Leine) çayı ilə qarşılaşdılar. Ətraf mühitə zərər verməmək üçün fərqli bir həll yolu tapıldı:
İsti su xətti çayın üzərindən deyil, onun təxminən 10 metr altından keçirilir.
Çay altından keçən bu üfüqi qazma sisteminin uzunluğu 4,1 kilometrdir.
Bu üsul həm görüntü çirkliliyinin qarşısını alır, həm də ətraf mühitə təsiri minimuma endirir.
Hannover rəhbərliyi bu və bənzər fərqli enerji layihələri vasitəsilə 2030-cu ilə qədər şəhərin enerji ehtiyacının böyük hissəsini bərpa olunan mənbələrdən təmin etməyi planlaşdırır.
Lalə Qüdrətova
Milli.Az