Artan əhali və iqlim dəyişikliyinin gətirdiyi dəniz səviyyəsinin qalxması təhlükəsi, memarları qurudan kənarda həll yolları axtarmağa vadar edir. Bu sahədə ən inqilabi addımlardan biri Cənubi Koreyada reallaşdırılacaq "Oceanix Busan" layihəsidir.
Milli.Az xəbər verir ki, Cənubi Koreyanın Busan şəhəri yaxınlığında planlaşdırılan bu layihə, sadəcə bir yaşayış sahəsi deyil, həm də iqlim böhranına qarşı bir mühəndislik cavabıdır.
Şəhər dəniz üzərində bir-birinə bağlı olan altıbucaqlı (heksaqonal) platformalardan ibarət olacaq. Bu həndəsi forma şəhərin ehtiyaca görə genişləndirilməsini və dalğalara qarşı daha davamlı olmasını təmin edir. Layihə tamamlandıqda burada yaşayış binaları, ofislər, otellər və geniş yaşıl parklar eyni platformalarda birləşəcək.
"Oceanix Busan" öz ehtiyaclarını kənardan dəstək almadan təmin edən "ağıllı ekosistem" kimi dizayn edilib.
Binaların damları və platformaların kənarları tamamilə günəş panelləri ilə örtüləcək.
Yağış sularının toplanması və dəniz suyunun təmizlənməsi sistemləri sakinləri şirin su ilə təmin edəcək.
Bütün tullantılar geri çevrilərək şəhərin daxili təsərrüfatında və enerji istehsalında istifadə olunacaq.
Hazırda layihənin planlaşdırma və sənədləşdirmə mərhələsi davam edir. İnşaat işlərinin rəsmi icazələrdən asılı olaraq 2026-cı ildə başlaması proqnozlaşdırılır. Bu, şəhərin yaxın illərdə real bir yaşayış mərkəzinə çevriləcəyi deməkdir.
Ekspertlərin fikrincə, bu layihə dəniz kənarında yerləşən və suyun altında qalma riski olan şəhərlər üçün xilasedici model ola bilər. Lakin layihənin maliyyə xərcləri, texniki mürəkkəbliyi və dəniz ekosisteminə (canlılara) verə biləcəyi təsirlər hələ də elmi dairələrdə müzakirə olunmaqdadır.
Lalə Qüdrətova
Milli.Az